Pantina thotë se Albin Kurti nuk i ka të gjitha informatat, tregon pse ai kundërshtonte të hapte një llogari në Facebook

Deputetja e Lëvizjes Vetëvendosje, Shqipe Pantina, ka treguar përse nuk mori pjesë në mbledhjen e djeshme të Këshillit të Vetëvendosjes.

“Unë nuk kam qenë në Prishtinë dhe e kam pasur të pamundur të marrë pjesë”, ka pohuar ajo, duke shtuar se nuk ka qenë dakord as me mënyrën “se si u thirr dhe si u mbajt mbledhja”.

“Ne jemi dakorduar më parë që për këtë çështje të mos diskutojmë më para se të lirohet Albin Kurti, pasi ai është një nga njerëzit kyç dhe pa praninë e tij nuk do t’i kontribuonte zgjidhjes së situatës asnjë diskutim”.

Ajo ka komentuar edhe letrën e Albin Kurtit e shkruar nga burgu.

“Albini nuk i ka të gjitha informatat. Letra e tij nuk prodhoi ndonjë zgjidhje të problemit, ne kemi pasur diskutime të gjata me Albinin dhe ai gjithmonë ka thënë se ai parapëlqen që diskutimet të bëhen fytyrë me fytyrë”.

“Por, kishte njerëz që insistonin që kjo mbledhje të mbahej para lirimit të tij”.

Pantina në InfoMagazinë të Klan Kosovës, ka folur edhe për atë se a ekzistojnë grupe brenda VV-së dhe cilit grup i takon ajo.

“Unë nuk besoj se në Vetëvendosje ka krahë. Ka njerëz që kanë shqetësimet e tyre në lidhje me atë si funksionin Vetëvendosje dhe insistojnë për një demokraci të hapur dhe një nga këtë njerëz jam edhe unë”.

“Dua që në VV të ketë demokraci të mirëfilltë, ku ideja e secilit vlerësohet dhe merren vendime të përbashkëta”.

“Ka edhe një grup tjetër që mendon se figura e Albinit e përfaqëson Vetëvendosjen dhe ne të tjerët vetëm duhet ta ndjekim prapa”.

Ndërkaq, siç shkruan Metro, derisa gazetari ia bëri me dije se Albin Kurti ishte në një formë në atë Këshill, duke ia përmendur letrën e Kurtit, ajo tha se Albini po e bën të kundërtën e asaj që thoshte se pëlqen.

“Ajo letër nuk do ta zgjidh ndonjë problem. Pasi problemi nuk është as i thjeshtë sa të zgjidhet me letër. Unë mbaj mend kur diskutonim me Albinin që ai të hapte një Facebook, dhe ai kundërshtonte, ngase thoshte se diskutimin me njerëz duhet ta bëjmë ballëpërballë”, tha deputetja Patina. /Telegrafi/