Panik për bombë në Torino, tifozët e Juventusit lëndohen duke ikur pas shpërthimit të një fishekzjarri (Video)

Disa tifozë të Juventusit janë lënduar pasi frika nga bomba ka nxitur panik në Piazza San Carlo të Torinos, ku ishin grumbulluar tifozët e Zonjës së Vjetër për ta shikuar finalen e Ligës së Kampionëve kundër Real Madridit.

Rreth 20.000 njerëz ishin grumbulluar në qendër të qytetit për ta shikuar në ekranin e madh finalen e garës më të madhe për klube që u zhvillua të shtunën mbrëma në Cardiff.

Kur po afroheshin minutat e fundit të ndeshjes, menjëherë pas golit të tretë të Realit, është lëshuar një fishekzjarr i fuqishëm që ka nxitur panik.

Dhe nga frika e sulmeve eventuale, njerëzit filluan të iknin duke shkaktuar përplasje dhe lëndime ndërmjet njëri-tjetrit.

Pas shpërthimit në koncertin e Ariana Grandes në Mançester, në gjithë Evropën është përhapur frikë për sulme eventuale, prandaj në evenimente ku ka shumë njerëz gjithmonë krijohet panik.

Juventusi humbi me rezultat 4-1 në finalen e Ligës së Kampionëve, me ç’rast Real Madridi shkroi historinë duke u bërë klubi i parë që e fiton dy herë radhazi formatin aktual të kësaj gare. /Telegrafi/