Organizohet pritje për veteranen e ushtrisë kanadeze që u përkujdes për fëmijët në Drenas gjatë misionit të saj në Kosovë

Nesër (06 Qershor 2019), nga ora 11:00 në Aeroportin e Prishtinës organizohet mirëpritje për veteranen e ushtrisë kanadeze Sophie Levesque Boisvert, ushtarja e cila nëpërmjet trupave të NATO-së u kujdes edhe për fëmijët e Drenasit. Transport gatis për qytetarët nga Prishtina.

Sophie Levesque Boisvert është një ish-ushtare kanadeze e cila nëpërmjet KFOR ka shërbyer në Kosovë, më saktësisht në Drenas, në vitet '99. Në atë kohë, përveç ushtare, ajo vullnetarisht është kujdesur edhe për fëmijët, nga lodrat e vizatimet e deri tek ofrimi i kujdesit mjekësor.

Në Qershor të vitit 2018, nëpërmjet fotografive i kërkoi 21 fëmijë për të cilët ishte kujdesur më shumë. Fatmirësisht, përbrenda 72 orëve të gjithë ata persona u identifikuan. Kjo ushtare, tash pas më shumë se 20 viteve vjen në Kosovë, për ti takuar ata fëmijë por edhe për ta vizituar vendin të cilin ndihmoi të çlirohet.

Me këtë rast organizata jo-qeveritare Qendra Rinisë Drenas, në bashkëpunim me grupin e fëmijëve kanë organizuar një pritje në Aeroportin e Prishtinës, për të shprehur mirënjohjen dhe falënderimin tonë për kontributin e saj dhe sakrificat që i ka bërë gjatë kohës së shërbimit të saj në Kosovë.

Pritja do të organizohet në daljen e rregullt të udhëtarëve, ku do ti dhurohen lule nga vajza e njërës prej personave për të cilët është kujdesur. Pastaj nga OJQ – Qendra Rinisë Drenas dhe anëtarët e grupit në shenjë simbolike do ti dhurohet Flamuri i Kosovës dhe mirënjohje. Pjesëmarrja është e hapur për të gjithë qytetarët që duan të tregojnë falënderimin apo t’i dhurojnë ndonjë lule apo dhuratë, transmeton Telegrafi.