Opozita në Serbi, për ndryshimin e Ligjit për Referendum: Ky është paralajmërim për njohjen e Kosovës

Kryetari i Partisë Demokratike të Serbisë (DSS) Millosh Jovanoviq tha sot se paralajmërimi i nxjerrjes së Ligjit të ri për Referendumin dhe nismën e popullore është në funksion i ndryshimit të planifikuar të Kushtetutës së Serbisë dhe aktit përfundimtar të tradhtisë së interesave shtetërore, duke njohur pavarësinë e Kosovës.

“Nëse ligji i propozuar miratohet në Kuvendin e Serbisë, të gjitha partitë e mazhorancës në pushtet definitivisht do të përcaktohen si antishtetërore, antikombëtar dhe jodemokratike”, tha lideri DSS, i cili është edhe anëtar i Kryesisë së lëvizjes “Fshesa 2020” (Metla 2020).

Siç shkruan “Beta”, Jovanoviq ka vlerësuar se heqja e censusit i cili përcakton pjesëmarrjen e gjysmës së qytetarëve me të drejtë vote si kusht i vlefshmërisë së referendumit republikan, është i papranueshëm dhe paraqet pakuptimësinë e referendumit, si formë e pjesëmarrjes së drejtpërdrejtë të qytetarëve në nxjerrjen e vendimeve më të rëndësishme, siç është ndryshimi i kufijve të Serbisë dhe ndryshimi i Kushtetutës, përcjell Telegrafi.

“Arsyetimi i propozuesve të Projektligjit për Referendum dhe nismë popullore që të fshihet kushti i pjesëmarrjes mbi 50% të votuesbe të regjistruar, në mënyrë që ligji i ri të harmonizohet me Kushtetutën, thjesht nuk qëndron. Kushtetuta nuk parashikon numrin e nevojshëm të daljes së votuesve që referendumi të jetë i vlefshëm, por thjesht tregon që vendimi merret me shumicën e votuesve, që kanë dalë të votojnë “, tha Jovanoviq.

Edhe nënkryetari i Partisë Popullore Miroslav Aleksiq tha se kundërshton ndryshimet e paralajmëruara në Ligjin për Referendum, duke thënë se me këtë synohet të lehtësohet njohja e Kosovës si një shtet të pavarur.

Sipas ligjit ekzistues për referendum në Serbi, për tu konsideruar i suksesshëm ose i dështuar deklarimi i qytetarëve ishte e nevojshme të dilnin në votim më shumë se gjysma e votuesve të regjistruar, ose 50 për qind plus një.

Mirëpo, në Projektligjin e ri për Referendum dhe nismë popullore, të përgatitur nga Ministria e Administratës Publike, kjo dispozitë nuk ekziston. /Telegrafi/