Numri i të vdekurve arrin në katër, pas shembjes së një ndërtese nga një shpërthim gazi në Itali – publikohen pamje tjera nga vendi i ngjarjes

Katër persona humbën jetën dhe pesë të tjerë rezultojnë të zhdukur pasi një ndërtesë katërkatëshe u shemb në ishullin italian të Sicilisë si pasojë e një shpërthimi gazi.

Sipas mediave të huaja, përcjell Telegrafi, ndërtesa u dogj pasi një tub gazi natyror shpërtheu në qytetin jugor të Ravanusa pranë Agrigento, qyteti jugperëndimor sicilian i famshëm për tempujt e tij grekë, raporton agjencia italiane e lajmeve ANSA.

Dy gra u nxorën të gjalla nga rrënojat pas shembjes të së shtunës mbrëma, dhe shpëtimtarët dhe qentë nuhatës po kërkonin ende për të zhdukurit, që besohet se përfshin një çift të ri që prisnin një fëmijë.

Një nga gratë e shpëtuara besohet të jetë një 80-vjeçare e cila u dërgua në spitalin lokal të Licata me fraktura të rënda.

Tjetra duket të jetë kunata e saj, të cilën shpëtuesit mundën ta gjenin pasi dëgjuan telefonin e saj që binte në mes të rrënojave.

Njësia lokale e shërbimit të mbrojtjes civile të Italisë konfirmoi në rrjetin e saj në Twitter se numri i të vdekurve aktualisht ishte katër.

Ndërkohë imazhet televizive treguan një masë rrënojash dhe trarësh druri në një hapësirë të madhe boshe ku dikur qëndronte ndërtesa, me ndërtesat fqinje të djegura dhe të dëmtuara gjithashtu.

Shpërthimi ka të ngjarë të jetë shkaktuar nga një rrjedhje gazi, thanë autoritetet, të cilat kanë hapur një hetim.

Menjëherë pas shpërthimit të së shtunës mbrëma, kryebashkiaku i Ravanusa-s, Carmello D’Angelo apeloi në Facebook për ‘të gjithë në dispozicion që kanë lopata dhe buldozerë’.

Rreth 50 persona janë zhvendosur, tha D’Angelo për Rainews24, pasi në shpërthim u dëmtuan edhe dy banesa ngjitur. /Telegrafi/