Një e treta e specieve të Tokës mund të zhduken deri në vitin 2100 shkaku i ndryshimeve klimatike

Pothuajse një e treta e specieve në mbarë botën do të rrezikoheshin të zhdukeshin deri në fund të shekullit, shkaku i ndryshimeve klimatike, sipas një studimi të ri.

Studimi zbuloi se nëse temperaturat globale rriten në 1.5 gradë Celsius mbi temperaturën mesatare para-industriale, duke tejkaluar objektivin e Marrëveshjes së Parisit, zhdukjet do të përshpejtoheshin me shpejtësi – veçanërisht për amfibët; specie në ekosistemet malore, ishullore dhe të ujërave të ëmbla; dhe specie në Amerikën e Jugut, Australi dhe Zelandën e Re.

Toka tashmë është ngrohur rreth 1 gradë Celsius që nga Revolucioni Industrial.

Bëhet e ditur se ndryshimi i klimës shkakton ndryshime në temperatura dhe modele të reshjeve, duke ndryshuar habitatet dhe ndërveprimet e specieve, shkruajnë mediat e huaja, përcjell Telegrafi.

Ndërsa disa specie mund të përshtaten ose migrojnë në përgjigje të kushteve mjedisore në ndryshim, disa nuk mund t’i mbijetojnë ndryshimeve drastike mjedisore, duke rezultuar në rënie të popullsisë dhe ndonjëherë në zhdukje.

Vlerësimet globale kanë parashikuar rreziqe në rritje të zhdukjes për mbi një milion specie, por shkencëtarët nuk e kanë kuptuar qartë se si lidhet saktësisht ky rrezik në rritje me ndryshimin e klimës.

Studimi i ri, i botuar në revistën Science, analizoi mbi 30 vjet kërkime të biodiversitetit dhe ndryshimeve klimatike, duke përfshirë mbi 450 studime të specieve më të njohura.

Siç raportohet, nëse emetimet e gazit serrë menaxhohen në përputhje me Marrëveshjen e Parisit, gati 1 në 50 specie në mbarë botën – rreth 180,000 specie – do të rrezikohen të zhduken deri në vitin 2100.

Kur temperatura të rritet për 2,7 gradë Celsius, e cila parashikohet sipas angazhimeve aktuale ndërkombëtare të emetimeve, 1 në 20 specie në mbarë botën do të rrezikohej të zhdukej.

Ngrohja hipotetike përtej kësaj pike bën që numri i specieve në rrezik të rritet ndjeshëm: 14.9% e specieve ishin në rrezik zhdukjeje sipas një skenari ngrohjeje prej 4.3 gradë Celsius, i cili supozon emetime të larta të gazrave serrë.

Dhe 29,7% e të gjitha specieve do të rrezikoheshin të zhdukeshin sipas një skenari të ngrohjes 5,4 gradë Celsius, një vlerësim i lartë, por që është i mundur duke pasur parasysh tendencat aktuale të emetimeve.

Ndryshe, kufizimi i emetimeve të gazeve serrë mund të ngadalësojë ngrohjen dhe të ndalojë këto rreziqe në rritje të zhdukjes, por të kuptuarit se cilat specie dhe ekosisteme janë më të prekura nga ndryshimet klimatike mund të ndihmojë gjithashtu në synimin e përpjekjeve të ruajtjes aty ku nevojiten më shumë. /Telegrafi/