Posa të hysh në oborr, në shikim të parë duket gërmadhë e luftës. Nuk ka dritare e as dyer – e kulmi i saj të jep përshtypjen se nga çasti në çast do të bie....!
Kjo është “shtëpia”, në të cilën jeton 69-vjeçarja Magdalena Isufi nga komuna e Vitisë.
Ajo ka rrëfyer për Telegrafin, se shtëpia i është dhënë vetëm për shfrytëzim pasi nuk ka pasur zgjidhje tjetër ku të shkojë.
E moshuara jeton me vajzën dhe djalin e saj për të cilin thotë se nuk është mirë me shëndet mendor - e për të shëruar atë nuk ka mjete financiare.
“Nuk është kjo shtëpi e jona e huaja është, është shumë ftohtë dhe beton as nuk kemi tokë as banës as asnjë gjë. Unë i kam dy fëmijë një vajzë dhe një djalë por ky djali nuk është mirë, me mend nuk është mirë e kam pas tek një psikiatër por nuk po mundem me ja ble barnat sepse shumë të shtrenjta ”, tregon ajo.
Tutje tregon se burri i saj vdiq shkaku i të ftohtit të madh dhe mungesës së barnave.
E vetë po ashtu është e sëmurë dhe nuk merr ndonjë ndihmë sociale nga komuna përveç pensionit që i takon për moshën.
“Nuk kemi të ardhura tjera vetëm pensionin që e marr 99 euro, e prej që ka vdek burri nuk jam mirë as unë prej kushteve të kqija ai u sëmurë dhe vdiq sidomos prej të ftohtit e ka pas sëmundjen, kam qenë” tha tutje ajo.
Magdalena thotë që shtëpia në të cilën jetojnë aktualisht nuk është e tyre por e një serbi dhe në momentin që mundet ai do ta shes shtëpinë.
“Nuk është kjo shtëpi e jonja e huaja është, është shumë ftohtë dhe beton as nuk kemi tokë as banes as asnjë gjë, nesër më qet prej shtëpisë mbes në rrugë. ” tha Magdalena.
Magdalena Isufi
E për shkak të problemeve me shëndet ajo ditë më parë u rrëzua duke shkuar në barnatore dhe nuk mund të levizë, për shkak se e kishte lënduar këmbën.
"Kam qenë duke shkuar tek barnatorja për me ble barna, edhe duke e bërë pagesën mu terruan sytë edhe më nuk di deri sa më ka ardh vetëdija, e kam parë vetën në spital”, përfundoi ajo./Telegrafi/
