Në Samitin e Berlinit të bëhet e qartë se territori i Kosovës nuk negociohet, thonë analistët

Takimi mes liderëve të Ballkanit Perëndimor, i cili është organizuar nga kancelarja gjermane, Angela Merkel, si dhe presidenti francez, Emanuel Macron, po cilësohet si një moment shumë i rëndësishëm.

Taulant Kryeziu nga Instituti EPIK, vlerëson se Samiti i Berlinit ka mjaft rëndësi, dhe se nga takimi pret që udhëheqësit e Kosovës t’ua bëjnë të qartë të gjitha shteteve që territori i Kosovës është i panegociueshem.

“Pres që në kuadër të takimit që po organizohet nga kancelarja Merkel dhe presidenti Macron, të jetë një moment i ri i parimeve të reja negociuese ndaj Kosovës dhe Serbisë. Dhe, kjo nënkupton që në parimet e reja negociuese, Kosova t’ia qartësojë edhe një herë pozicionin jo vetëm shteteve të Bashkimit Evropian, por të gjithave që territori i Kosovës nuk negociohet”, theksoi Kryeziu për Telegrafin.

Kryeziu, ndër të tjera tha se Gjermania gjithmonë ka qenë kundër idesë së korrigjimit të kufijve, dhe që edhe gjuha e palës kosovare duhet të jetë e tillë.

“Është shumë e rëndësishme që ky takim po mbahet në Gjermani. Dhe Gjermania gjithmonë ka qenë kundër që të preket territori i Kosovës. Dhe territori të jetë pjesë e negociatave. Edhe gjuha e palës kosovare duhet të jetë e tillë”.

Më tej, ai thotë se udhëheqësit kosovarë duhet të bëjnë një kërkesë karshi Bashkimit Evropian, që Serbia rrugën në BE ta ketë të hapur vetëm kur ta njohë pavarësinë e Kosovës.

“Duhet të bëjnë kërkesë karshi BE-së, që Serbia rrugën për në Bashkimin Evropian ta ketë të hapur vetëm pasi ta njohë Kosovën e pavarur dhe asnjë centimetër tokë të mos jetë pjesë e bisedimeve dhe marrëveshja finale të mos e prek territorin”, tha ai.

Si përfundim, Kryeziu deklaroi se Kosova duhet ta sheh si fuqi kryesore Gjermaninë së bashku me SHBA-në, dhe që ajo  është përcaktuese për të gjitha në BE.

Kurse, njohësi i integrimeve evropiane, Emrush Ujkani, për Telegrafin potencoi se Samiti i Berlinit është moment i rëndësishëm sepse po ndodhë në një kohë kur Kosova e Serbia nuk kanë qenë kurrë më larg njëra-tjetrës.

“Samiti i Berlinit është një moment shumë i rëndësishëm sepse po ndodhë një një kohë në të cilën të dy vendet kurrë nuk kanë qenë më larg njëra-tjetrës që nga shpallja e pavarësisë së Kosovës”, ka theksuar ai.

Ujkani tha që, Samiti i Berlinit do të ju shërbejë Gjermanisë dhe Francës që në një mënyrë të shpejtojnë procesin e dialogut,  i cili sipas tij, BE-së i ka ikur nga dora.

“Dialogu i ndërmjetësuar nga BE, jo që nuk ka arritur të konkludojë më marrëveshje përfundimtare por as edhe t’i relaksojë  raportet mes dy vendeve. Rrjedhimisht takimi i Berlinit do të provohet të ju shërbejë Gjermanisë dhe Francës që në njëfarë mënyrë ata do ta shpëtojnë procesin i cili BE-së vetëm se i ka ikur nga dora”, ka thënë në fund të deklaratës Emrush Ujkani.

Samiti i Berlinit do të mbahet me 29 prill. Pjesëmarrjen në këtë Samit e kanë konfirmuar presidenti i Kosovës, Hashim Thaçi dhe kryeministri Ramush Haradinaj. /Telegrafi/