Sot (e mërkurë) është vënë gurthemeli i qendrës nacionale të xhudos në Pejë, e cila do të ndërtohet nga Federata e Xhudos e Kosovës në bashkëpunim me Federatën Ndërkombëtare.
Të pranishëm në këtë ceremoni ishin personalitet të shquara të komunitetit sportiv, ministrja për Kulturë, Rini dhe Sport Vlora Dumoshi, drejtuesit e Komitetit Olimpik të Kosovës, xhudistët e klubit "Ippon" nga Peja dhe kryetari i Komunës së Pejës, Gazmend Muhaxheri.
Kryetari i Federatës së Xhudos të Kosovës, Agron Kuka u shpreh se kjo qendër do të jetë qendra nga e cila do të dalin xhudistët më të mirë në Kosovës, të cilët do korrin edhe suksese ndërkombëtare.
"Për mua është privilegj dhe kënaqësi të jem pjesë e kësaj ngjarje, e ndërtimit të kësaj qendre nacionale të xhudos, duke e ditur që këtu do të ushtrojnë kampionët e tashëm, por edhe kampionët e ardhshëm të xhudos kosovare. Uroj që punët të na ecin mbarë me shpresë që vitin e ardhshëm, tash një vit ekipi ynë olimpik, nisjen ta bëjë nga kjo qendër e përfunduar", deklaroi Kuka.
Ministrja për Kulturë, Rini dhe Sport, Vlora Dumoshi, vënien e gurthemelit të kësaj Qendrës nacionale të xhudos e ka quajtur një ngjarje të madhe për sportin e Kosovës.
"Sot është një ngjarje shumë e madhe siç tha edhe kryetari i Federatës që po fillon ndërtimi i kësaj qendre e cila për shumë kohë është pritur. Sapo kam marrë drejtimin e MKRS-së si ministre jemi takuar me z.Wizer bashkë me kryetarin e Federatës, presidentit e KOK-ut dhe trajnerin Driton Kuka dhe kemi biseduar, dhe ai në një moment më ka thënë se a po më siguron që do të filloni ndërtimin e kësaj qendre. Kështu që ia kemi dhënë fjalën dha nga kjo ditë e falënderojmë", tha Dumoshi.
Kryetari i Komitetit Olimpik të Kosovës, Besim Hasani, u shpreh se xhudistëve kosovar vetëm infrastruktura i ka munguar dhe tani atë po e bëjnë kështu që tanimë sipas tij sukseset në këtë sport do të jenë edhe më të mëdha.
"Në emër të Komitetit Olimpik të Kosovës ju dëshiroj që të shfrytëzohen në maksimum këto pesë elemente dhe plus zemrën që e keni më të madhe se trupin dhe unë dëshiroj që nga Lojërat Olimpike të ktheheni me suksese sa më të mëdha që është e mundur dhe unë fuqishëm në këtë besoj", deklaroi Hasani.
Kujtojmë që kjo qendër pritet të nxjerrë talente në sportin e xhudos, sport ky që na ka bërë krenarë viteve të fundit me sukseset e mëdha të arritura në arenën ndërkombëtare./KosovaPress/
