Në ditëlindjen e tij, Roberto Carlos kujton: Capello më shpëtoi, pasi Roy Hodgson më shkatërroi te Interi

Roberto Carlos është padyshim një prej lojtarëve më të mirë të krahut të majtë në histori të futbollit. Por, në ngritjen e karrierës së tij, legjenda braziliane e konsideron më meritor strategun italian, Fabio Capello.

46-vjeçari ishte pjesë e Interit në sezonin 1995/1996, kur Roy Hodgson e kishte angazhuar si mesfushor, ndërkohë që ai ishte mbrojtës i majtë, pozitë në të cilën u bë më i miri te Real Madridi.

Ai u transferua te Los Blancos në fund të atij sezoni, kur drejtimin e madrilenëve e kishte marrë Capello.

“Roy Hodgson më shkatërroi te Interi, ai më detyroi të luaja në mesfushë. Nuk do të më jepej shansi të luaja për ekipin kombëtar, ndërsa po afronte Copa America në vitin 1997”.

“Nuk kishim raporte të mira, por unë nuk dija shumë për futbollin evropian”, ka treguar Carlos për Marca.

“Bisedova me Morattin dhe i kërkova të më lejonte të largohesha. Shkova te Madridi për Capellon, ai është trajneri më i rëndësishëm që kam pasur”, ka shtuar braziliani.

Te Reali, Carlos qëndroi deri në vitin 2007, duke fituar katër tituj të La Ligas, tre tituj të Ligës së Kampionëve, dy Kupa Interkontinentale, tri Superkupa të Spanjës dhe një Superkupë të UEFA-s.

Gjatë kësaj periudhe e fitoi dy herë Copa America, një Kupë të Konfederatave dhe një herë Kampionatin Botëror me Brazilin. /Telegrafi/