Në Bjeshkët e Rugovës, Gjilanit dhe Vitisë ka ende vatra zjarri

Situata me zjarret në Kosovë është nën kontroll në gjithë vendin, megjithëse disa vatra janë ende të pashuara plotësisht. Kështu ka konfirmuar për Telegrafin, zëdhënësi në Agjencinë e Menaxhimit Emergjent, Nehat Koçinaj.

Koçinaj deklaroi se raporti i datës 7 gusht bën të ditur se situata është e menaxhueshme.

“Falë gjitha rrethanave dhe reagimit nga momentet e para të shfaqjes së zjarreve, situata konsiderohet nën kontroll në gjithë vendin. Nga raporti i orës 11.00 dt. 07.08.2021 i Qendrës Operative të Agjencisë Menaxhimit Emergjent MPB, situata është e menaxhueshme në gjithë vendin. Vatra te zjarrit ende të pa pushuara plotësisht mbetet e parkut kombëtare Bjeshkët e Rugovës Shtupeq, dhe Rajoni i Gjilanit, zjarri në Komunën e Vitisë fshati i ri. Të dytë janë në kontroll dhe menaxhohen nga forca operative në vendngjarje”, deklaroi ai.

Ndryshe, edhe ministri i Mbrojtjes, Armend Mehaj, ka deklaruar se gjatë ditëve në vijim, njësitet e FSK-së do të vazhdojnë të bëjnë vëzhgimin e terrenit si dhe vlerësimin e situatës në vendin tonë, me qëllim reagimin në kohë për shpëtimin e jetëve të njerëzve, pasurisë së qytetarëve dhe minimizimin e pasojave.

Për situatën e krijuar me zjarre, Policia e Kosovës ka njoftuar edhe përmes raportit 24 orësh. Në raport thuhet se në 24 orët e fundit ka arrestuar një person, i cili i kishte vënë zjarr arës së tij, e që më pas zjarri është përhapur. /Telegrafi/