Manchester United ka pësuar humbje me rezultat minimal 1-0 në shtëpi nga Wolves në kuadër të xhiros së 33-të në Ligën Premier.
Pjesa e parë ishte mjaft e qetë pa shumë raste shënimi me të dy ekipet që e zhvillonin lojën kryesisht me duele në mesfushë.
Rasti i vetëm që mund të theksohet është ai i Christian Eriksen i cili në minutën e 34-të nga gjuajtja e lirë e detyroi portierin të intervenojë.
I njëjti ritëm e përcolli pak a shumë edhe pjesën e dytë, por këtu mysafirët u treguan cinik duke shënuar në rastin e parë serioz që kishin.
Po luhej minuta e 77-të e ndeshjes kur Pablo Sarabia ekzekutoi për mrekulli një goditje dënimi e cila e la pa asnjë gjasë Andre Onanan.
Në minutën e 82-të Wolvesi pati mundësinë të shënonte edhe golin e dytë, por goditjen e fuqishme të Matheus Cunhas e priti Onana.
Pas kësaj humbje Unitedi tashmë ka shkuar në katër ndeshje pa fitore në kampionat dhe renditet në pozitën e 14-të në tabelë me 38 pikë të grumbulluara./Telegrafi/
