Ndërron jetë Svetozar Marjanoviq, gjenerali që nënshkroi “kapitullimin e Serbisë në Kosovë”

Ka ndërruar jetë Svetozar Marjanoviq, 77 vjeç, një gjeneral serb që sipas mediave serbe, mbahet mend si një nga nënshkruesit e Marrëveshjes së Kumanovës.

Sipas mediave serbe, përcjell Telegrafi, Svetozar Marjanoviq është i njohur si një nga nënshkruesit e Marrëveshjes së Kumanovës, e cila shënoi “kapitullimin e Serbisë në Kosovë”, përkatësisht të Republikës së atëhershme Federative të Jugosllavisë.

Dokumenti i nënshkruar më 9 qershor 1999, ndër të tjera përfshinte tërheqjen e ushtrisë dhe policisë serbe nga Kosova dhe futjen e forcave të NATO-s në Kosovë.

Nënshkruesit e dokumentit për bashkëpunimin ushtarako-teknik ishin në emër të forcave ndërkombëtare të NATO-s dhe KFOR-it, gjenerali britanik Michael Jackson, dhe në emër të RF të Jugosllavisë, gjenerali i policisë Obrad Stevanoviq dhe gjeneralkoloneli i Ushtrisë Jugosllave, Svetozar Marjanoviq.

Sipas mediave serbe, Marjanoviq ka ndërruar jetë të shtunën për shkak të problemeve me zemrën.

Ndryshe, marrëveshja është arritur pas fushatës së bombardimeve të NATO-s mbi caqet serbe, e cila ka zgjatur për 78 ditë me radhë, si dhe pas përpjekjeve diplomatike për t’i dhënë fund luftës në Kosovë, gjatë të cilës mbi 15 mijë njerëz janë vrarë ose zhdukur dhe mbi një milion janë zhvendosur.

Shkatërrimet materiale po ashtu kanë qenë masive.

Më 12 qershor të vitit 1999, në Kosovë kanë zbarkuar trupat e para të këmbësorisë së NATO-s, ndërsa ka nisur largimi i forcave serbe.

Sekretari i përgjithshëm i NATO-së, Javier Solana, më 10 qershor 1999 kishte lëshuar urdhrin për ndalimin e bombardimit dhe Këshilli i Sigurisë së OKB-së miratoi Rezolutën 1244, sipas të cilës në Kosovë u dërguan 37.200 ushtarë të KFOR-it nga 36 shtete.

Misioni ishte i ndarë në pesë zona të përgjegjësisë, që i përkisnin KFOR-it amerikan, anglez, francez, gjerman dhe italian.

Me hyrjen e NATO-s, në Kosovë nisi edhe vendosja e misionit të përkohshëm të Organizatës së Kombeve të Bashkuara, i cili do të administronte vendin për një periudhë të caktuar kohore.

Në të njëjtën kohë, është shpërbërë edhe Ushtria Çlirimtare e Kosovës, për t’u shndërruar në Trupat Mbrojtëse të Kosovës – më pas edhe në Ushtrinë e Kosovës.

Kosova shpalli pavarësinë më 17 shkurt të vitit 2008. /Telegrafi/