Ndërron jetë ikona e televizionit amerikan me origjinë shqiptare, Regis Philbin

Prezantuesi, aktori, këngëtari dhe ikona e televizionit amerikan i cili njëherësh është quajtur ‘njeriu më i zoti në showbiz’ ka vdekur këtë fundjavë.

Lajmin për vdekjen e legjendës amerikane me origjinë arbëreshe e ka dhënë familja e tij në një deklaratë për revistën People.

“Familja dhe miqtë janë gjithmonë mirënjohës për kohën që kaluam me të – për ngrohtësinë e tij, sensin legjendar të humorit dhe aftësinë për të kthyer çdo ditë në diçka që ia vlen të flasim. Ne i falënderojmë fansat e tij dhe admiruesit për mbështetjen e tyre të jashtëzakonshme gjatë karrierës së tij 60-vjeçare”, thuhet në deklaratën e tyre.

Një burim thotë për TMZ se Regis vdiq të shtunën herët pasi pësoi një sulm në zemër në shtëpinë e tij, në Connecticut – megjithëse, ne nuk e kemi konfirmuar atë me familjen në këtë pikë.

Në vdekjen e tij, duhet të themi se Regis ishte një yll midis yjeve me një karrierë të bujshme e storie të ndryshme suksesi.

I njëjti filloi karrierën në Hollywood në vitet ’50 duke punuar në “The Tonight Show”, teksa mban rekordin ‘Guinnes’ për kohën më të gjatë që ka qëndruar para kamerës pa ndërprerje.

Ai vazhdoi të punojë në lajmet lokale për pak dhe madje pati shfaqjen e tij në vitet ’60 në “The Joey Bishop Show”,e më pas në shumë shfaqje të tjera televizive.

Kohë më parë, Philpin bëri të ditur se origjina e tij është arbëreshe dhe se vjen nga një fshat në Italinë e Jugut.

Regis është i njohur si personi më punëtor në showbiznes në Amerikë, i famshëm për programet “Live with Regis and Kathie Lee”, “Live with Regis and Kelly”, “Who Wants to Be a Millionaire”, “America’s Got Talent” etj.

Moderatori, që vdiq në moshën 88-vjeçare, ka lënë pas gruan Joy, tre fëmijët si dhe nipërit e mbesat.

Djali i tij, Danny, vdiq në vitin 2014. /Telegrafi/