Colin 'Smiley' Petersen, bateristi i parë dhe një nga figurat më të rëndësishme në suksesin e hershëm të Bee Gees, u nda nga jeta më 18 nëntor, në moshën 78-vjeçare.
Ai mbetet i paharruar për kontributin e tij në disa nga hitet më të njohura të grupit, si “Massachusetts”, “To Love Somebody” dhe “Words”.
Petersen luajti një rol të pazëvendësueshëm në formimin e tingullit të veçantë të Bee Gees, duke ofruar ritme që ishin thelbësore për suksesin e albumeve të tyre të hershme, shkruan DailyMail.
Bashkëpunimi i tij me vëllezërit Gibb ndihmoi në ndërtimin e rrugës së grupit drejt yllësisë ndërkombëtare.
Petersen la pas ish-gruan e tij Joanne dhe dy djemtë e tyre, Jaime dhe Ben. Përveç muzikës, jeta e tij ishte e pasur edhe në ekran.
Ai filloi si aktor fëmijë dhe fitoi famë me rolin e tij në filmin klasik australian “Smiley”, nga i cili mori pseudonimin që e shoqëroi gjatë gjithë jetës.
Kalimi nga aktrimi te muzika tregoi talentin e tij të jashtëzakonshëm në dy fusha të ndryshme.
Në vitet e fundit, Petersen u rikthye në vëmendjen e publikut përmes pjesëmarrjes së tij në shfaqjen ”The Best of the Bee Gees”.
Në një intervistë të vitit 2022 me Jason Barnard në “The Strange Brew Podcast”, ai ndau kujtime të çmuara për kohën e tij me grupin dhe stilin e tij unik të të luajturit në bateri. /Telegrafi/
