NATO për ‘bombën e pistë’: Rusia shpesh akuzon tjerët për atë që ajo vet planifikon të bëjë

Pretendimet e rusëve se Ukraina planifikon përdorimin e “bombës së pistë”, është një “gënjeshtër” që Kremlini nuk guxon ta përdor si pretekst për eskalim të luftës.

Këto komente i bëri sot i pari i Aleancës Veri-Atlantike, Jens Stoltenberg para gazetarëve, transmeton Telegrafi.

“Rusia tani rrejshëm pretendon se Ukraina po përgatitet të përdorë bombën bërthamore në territorin e saj. Aleanca e NATO-s mohon këto pretendime të rrejshme. Rusia shpesh akuzon të tjerët për atë se ajo vet planifikon të bëjë. E kemi parë këtë edhe më herët, nga Siria e deri në Ukrainë. Rusia nuk guxon si pretekst ta përdor këtë për eskalimin e luftës”, shtoi kreu i NATO-s.

Sekretari i Përgjithshëm i NATO-s, i përshkroi pretendimet ruse si “të papërgjegjshme”.

“Çfarëdo përdorimi i armëve bërthamore në Ukrainë do të ndryshojë natyrën e luftës”, tha Stoltenberg, duke shtuar se Putin e di se në luftën bërthamore nuk ka fitues, dhe se kurrë nuk duhet të zhvillohet një luftë e tillë.

Ai theksoi se në Moskë gjithashtu e dinë se një gjë e tillë do të shkaktonte pasoja të rënda. /Telegrafi/