Nagavci: Këshilltarët për karrierë do t’i identifikojnë shkathtësitë e nxënësve

Ministrja e Arsimit, Arbërie Nagavci, ka njoftuar të mërkurën se kanë publikuar në Platformën e diskutimeve publike Udhëzimin administrativ për këshilltarët për karrierë në institucionet e arsimit profesional.

Siç ka bërë të ditur ajo, në këtë platformë udhëzimi në fjalë do të jetë i hapur deri më 16 qershor 2023.

“Ftoj të gjithë të interesuarit që të dërgojnë komentet dhe sugjerimet e tyre në këtë link”, ka shkruar Nagavci në Facebook.

Ajo tutje ka thënë se këshilltarët për karrierë kanë rëndësi të madhe për sistemin arsimor, pasi do të kontribuojnë për t’i mësuar nxënësit për të ndërtuar vetëbesimin dhe për t’i fuqizuar ata, për të identifikuar shkathtësitë e tyre, lehtësuar punësimin dhe për t’i pajisur me shkathtësi që “të lundrojnë suksesshëm në botën e punës”.

“Kemi publikuar në Platformën e diskutimeve publike Udhëzimin administrativ për këshilltarët për karrierë në institucionet e arsimit profesional. Ky UA e rregullon pozitën, funksionin, rolin, mënyrën e financimit, monitorimin dhe vlerësimin e këshilltarëve për karrierë në institucionet e arsimit parauniversitar (SHMU, gjimnaze dhe AAP)”.

“Këshilltarët për karrierë janë pjesë e skemave organizative të shkollave të mesme të ulëta dhe shkollave të mesme të larta në kuadër të Këshillit Profesional sipas UA për menaxhimin e brendshëm të shkollave”, ka shkruar tutje ministrja. /Telegrafi