Mustafa: LDK dhe LVV afër marrëveshjes finale, duhet të presim certifikimin për të parë nëse ka nevojë për partner të tretë

Zëdhënësi i Lidhjes Demokratike të Kosovës, njëherazi kandidat i kësaj partie për deputet, Besian Mustafa në një intervistë për “Përballje ditore” më gazetarin Muhamet Hajrullahu në Telegrafi.com, ka folur për takimet e fundit LDK-LVV dhe krijimin e institucioneve të reja të Kosovës.

Mustafa ka thënë se pas gjashtë takimeve të grupeve punuese LDK-LVV, kanë përfaruar programet në 95 për qind.

“LDK dhe LVV patën vendosur qysh kah fundi i tetorit që të fillojnë takimet e grupeve punuese, për përafrimin e dy programeve të dy partive, drejt një programi të përbashkët qeverisës. Pra, me një ide që të kemi një koalicion qeverisës LDK-LVV. Kemi edhe deklaratat e liderëve që pas certifikimit të rezultateve do të kemi edhe takimin përfundimtar të liderëve të dy partive Kurti-Mustafa, dhe të kemi nënshkrimin e marrëveshjes. Ne kemi mbajtur gjashtë takime të grupeve punuese ku kemi harmonizuar programet tona në sferat kryesore, i kemi përafruar programet deri në 95 për qind.  Kanë mbetur edhe tri apo katër pika që janë të nivelit politik, që duhet vendosur në nivel politik”, ka thënë ai.

Mustafa ka thënë se marrëveshja mes LDK-së dhe LVV-së, do të jetë marrëveshje më e detajuar në mes dy partive politike për bashkëqeverisje.

“Dokumenti që është prodhuar deri tani ka shumë faqe, dhe është i detajuar. Liderët Kurti dhe Mustafa do të kenë para vetës një marrëveshje të detajuar në nivelin teknik”, ka thënë ai.

Mustafa komentoi edhe vendimin e PZAP-it, për largimin e votave të ardhura nga Serbia, e që rrjedhimisht i bie që në Kuvend mund të jetë edhe koalicioni NISMA-AKR- PD.

“Në qoftë se do të vërtetohet kjo që do të jenë tre deputetë më pak të LVV-së, një më pak i LDK-së, një më pak i PDK-së dhe një më pak i AAK-PSD-së, dhe gjashtë deputetë të koalicionit NISMA-AKR, atëherë do të kemi një realitet të ri. Duhet të ulemi LDK-LVV të bisedojmë, vullneti në mes të dy partive tona mbetet i pandryshuar”, ka shtuar ai.

Tutja ai ka thënë se do të shohin se si do të veprojnë pas certifikimit të rezultateve të zgjedhjeve.

“Është realitetit  i ri nëse koalicioni NISMA-AKR hynë në parlament,  duhet studiuar se ku do mbesim. Ideja për të pasur 12 ministri është ide e qëlluar, se a do të ndahen këto 12 ministri edhe me një partner të tretë qoftë ajo NISMA apo dikush tjetër, mbetët të shihet pas certifikimit të rezultateve”, ka pohuar ai.

Mustafa ka thënë se do të do numërojmë LDK dhe LVV sa deputetë do të kenë, dhe nëse janë mjaftueshëm do të vazhdojnë vetëm, dhe nëse kanë nën 60 deputetë do të shohin nëse do të marrin një partner të ri dhe se kush do të jetë ai partner./Telegrafi/