Mushkolaj: Kurti e pret arrestimin me kompletu sagën e tij – por nuk do ta fitojë betejën me shtetin

Kryeministri i Kosovës, Albin Kurti, ka përsëritur të martën se është i gatshëm të japë dëshmi në rastin e rezervave shtetërore, por kërkon që intervistimi të bëhet në Zyrën e Kryeministrit.

Ai i bëri këto deklarata gjatë ditës nga Gjilani, ku mori pjesë në vendosjen e gurthemelit të një kopshti për fëmijë.

Në të njëjtën kohë, Kurti ishte i ftuar të paraqitej në Prokurorinë Speciale, me urdhër të Gjykatës Themelore të Prishtinës, por prapë nuk e bëri këtë.

Analisti Imer Mushkolaj ka kritikuar qëndrimin e kryeministrit, duke e quajtur atë një mesazh të gabuar për qytetarët dhe një sfidë ndaj shtetit.

Ai ka theksuar se ky veprim dëmton besimin në barazinë para ligjit.

“Unë e shoh dështim të prokurorisë. Prokuroria ka përgjegjës sepse nuk ka arrit dëshmitarin A.K., me çu me dëshmu për një rast të rëndësishëm, siç është rasti rreth dyshimeve për keqpërdorimit me rezervat shtetërore. E dyta, mesazhi që e dërgon dëshmitari Kurti në këtë rast është mesazh i gabuar për qytetarët e zakonshëm. Për shkak se me këtë logjikë asnjeri prej nesh nuk shkonte dëshmojë në rastet e tjera. Por, ky e ka këtë privilegj sepse e ka luftën politike me prokurorinë dhe nuk dëshiron me shku.

Kjo sipas meje është një betejë me shtetin që zoti Kurti nuk do ta fitojë. Nuk do ta fitojë. Ky veprim i Albin Kurtit, i kryeministrit Kurti, është promovim i pabarazisë të qytetarëve të Kosovës para ligjit. Ky është mesazhi më i keq që mund tu dërgohet qytetarëve. Një kryeministër i përgjegjshëm dëshmon…

Zoti Kurti po e pret këtë (arrestimin). Dhe me kompletu këtë sagën e tij në raport me prokurorinë”, ka thënë Mushkolaj në RTVDukagjini.