Murati jep detaje nga pakoja për përballje me inflacion, e krahason me pakon që ka shpërndarë Gjermania për shtetasit e saj

Ministri i Financave, Hekuran Murati, ka dhënë detaje për shpërndarjen e mjeteve financiare nga pakoja e re për përballje me inflacionin.

Murati ka thënë se pakoja e re kap shifrën e 2 për qind të Prodhimit të Brendshëm Bruto, duke ia kaluar edhe Gjermanisë e cila ka shpërndarë 65 miliardë euro.

“Bashkë me Kryeministrin Kurti dje prezantuam pakon e re të masave për përballje me inflacionin, në kuadër të vazhdimësisë së Pakos së Ringjalljes Ekonomike”, ka shkruar Murati.

“Pakoja kap vlerën prej 150 milionë euro, që përkthehet në rreth 2% të GDP, pa llogaritur pakon e muajit prill, apo masat paraprake”, shtoi ai.

Ministri i Financave kujtoi se Qeveria Gjermane sot ka prezantuar një pako masash të ngjashme në vlerë prej 65 miliardë euro, që përkthehet në rreth 1.8% të GDP.

Krahasimi i Ministrit të Financave

Për pensionerët:

Gjermania: 300 euro pagesë e njëhershme

Kosova: 3×100 euro (nentor ‘21, prill ‘22, tetor ‘22)

Për studentët:

Gjermania: 200 euro pagesë e njëhershme

Kosova: 2×100 euro (prill ‘22, nëntor ‘22)

Për punëtorët e sektorit publik:

Gjermania: 300 euro bruto pagesë e njëhershme

Kosova: 300 euro për 2022 (100 euro në prill ‘22, plus 50 euro/muaj nga shtatori ‘22)

Lexo po ashtu Gjermania jep 65 miliardë euro të për të mbrojtur bizneset nga kriza e energjisë dhe rritja e inflacionit

Për punëtorët e sektorit privat:

Gjermania: 300 euro bruto pagesë e njëhershme

Kosova: 100 euro në prill ‘22, plus 3 muaj subvencionim 50% i rritjes së pagës.

Për fëmijët:

Gjermania: Rritje e shtesave ekzistuese

Kosova: Nisje e pagesës së shtesave për herë të parë

“Ka edhe shumë masa tjera që kemi ndërmarrë për ta bërë më të lehtë përballjen me inflacionin, siç janë vendosja e çmimit tavan për naftën, subvencionimi i energjisë elektrike, mbështetja e bizneseve prodhuese në investime, rritja e subvencioneve në bujqësi etj.”, ka përfunduar Murati./Telegrafi/