BE mund të arrijë qëllimin e vaksinimit prej 70 për qind deri në korrik, thotë von der Leyen

Bashkimi Evropian duhet të ketë mjaft doza të vaksinës kundër Covid-19 për të arritur objektivin e parë të vaksinimit – më shpejt sesa pritej – sipas Presidentes së Komisionit Evropian Ursula von der Leyen.

“Tani jam e bindur se do të kemi doza të mjaftueshme për të vaksinuar 70 për qind të popullsisë së rritur në Bashkimin Evropian deri në korrik”, citohet të ketë thënë ajo gjatë një vizite në vendin e prodhimit të firmës Pfizer në qytetin belg të Puurs, përcjell Telegrafi.

Deri më tani, ky objektiv ishte caktuar për 21 shtator.

Kohët e fundit, Komisioneri Evropian i Tregut të Brendshëm, Thierry Breton tregoi se vaksinat e mjaftueshme do të shpërndahen në vendet e BE-së deri në mes të korrikut për të mbrojtur rreth 70 për qind të të rriturve.

Dhe sipas gjurmuesit të vaksinave të Qendrës Evropiane për Parandalimin dhe Kontrollin e Sëmundjeve, 24 për qind e të rriturve në BE dhe Zonën Ekonomike Evropiane kanë pasur të paktën një dozë dhe 9 për qind janë vaksinuar plotësisht.

Fushata e vaksinimit të BE-së filloi me vështirësi me pengesa dhe vonesa, tha të premten von der Leyen.

“Por ne ishim në gjendje t’i kundërviheshim atyre për shkak të portofolit tonë të gjerë të vaksinave dhe gjithashtu falë furnizuesve të fortë dhe të besueshëm si BioNTech-Pfizer”, ka thënë ajo në një konferencë të përbashkët shtypi me shefat ekzekutivë të dy kompanive dhe kryeministrin belg Alexander De Croo.

Një kontratë e re e planifikuar me ndërmarrjen farmaceutike gjermano-amerikane që siguron 1.8 miliard doza deri në vitin 2023 duhet të përfundojë brenda ditësh, tha von der Leyen. /Telegrafi/