Mourinho pas humbjes në finale: Gjyqtari dukej spanjoll, shkojmë në shtëpi të vdekur për shkak të një padrejtësie

Jose Mourinho ishte protagonisti gjatë dhe pas finales së Ligës së Evropës që Roma përfundoi duke humbur në penallti kundër Sevillas në stadiumin Puskas Arena në Budapest të Hungarisë.

Trajneri portugez ishte shumë kritik ndaj ecurisë së gjyqtarit në deklaratat e tij pas ndeshjes, ndërsa për skuadrën e tij tha se kthehen të vdekur në shtëpi.

“E vërteta është se ne të gjithë jemi shumë të trishtuar. Shkojmë në shtëpi të vdekur për shkak të një padrejtësie. Por, ishte një lojë e madhe, një finale e madhe”, ka thënë fillimisht Mourinho.

“Kishim shanset më të mira për të fituar. Pastaj penalltitë janë penallti, duhet t’i shënosh dhe ata kanë fituar”.

Lexo po ashtu Penalltitë vendimtare, Sevilla për herë të shtatë fituese e Ligës së Evropës

Mourinho nuk ngurroi të denonconte se gjyqtari iu duk spanjoll, aq shumë kartonë të verdhë dha.

“Kur duhej t’i jepte Lamelës të dytin, ai nuk ia dha. Dhe më pas shënoi një nga penalltitë. Është një padrejtësi”, këmbënguli portugezi.

Siete 🏆#UELfinal pic.twitter.com/Qm1zBDVEb0

— UEFA Europa League (@EuropaLeague) May 31, 2023

Ankesat e Mourinhos për gjykimin e Taylor në finale

Trajneri i Romës dha disa shembuj të asaj që ai i konsideroi vendime të këqija nga gjyqtari Anthony Taylor.

“Ndikimi i gjyqtarëve në ndeshjet tona është diçka me të cilën jemi mësuar, por në një finale evropiane nuk e prisja”.

“Vetëm shikoni gojën e Ibanez dhe kuptoni gjithçka, shihni Lamela që ka gjuajtur një penallti dhe duhet të ishte përjashtuar; Mjafton të shihni se skuadra që luajti më mirë në pjesën e parë është ajo që ka përfunduar me tre kartonë të verdhë. Pellegrini bie dhe është i verdhë, Ocampos simulon dhe nuk ka karton të verdhë”.

“Sevilla është një ekip i madh, është një realitet. Ata kanë një skuadër që ne nuk e kemi. Gjithashtu kanë përvojën. Ne patëm një pjesë të parë të shkëlqyer, pastaj padyshim që ata patën një reagim”, përfundoi trajneri i Romës. /Telegrafi/