Kapiteni i Prishtinës, Edmond Azemi, është sulmuar nga një tifoz i Rahovecit gjatë ndeshjes finale për titull kampion në Superligën e Kosovës në basketboll.
Z Mobile Prishtina është shpallur kampion i Kosovës në basketboll pasi ka mposhtur në finale Rahovecin.
Klubi kryeqytetas arriti të fitojë ndeshjen e katërt finale me rezultat 104:75 duke quar serinë e fitoreve në 3-1.
Megjithatë, edhe pse ndeshja nisi me një atmosferë të zjarrtë dhe impozante, por edhe me një palestër të stërmbushur, pati edhe incidente.
Një i tillë i turpshëm ndodhi një minutë pa përfunduar çereku i tretë.
Ishte një tifoz i Rahovecit, i cili hyri nga zona VIP në terrenin e lojës dhe sulmoi kapitenin e Prishtinës, Edmond Azemin, duke e goditur.
Pas këtij incidenti gjyqtarët ndërprenë ndeshjen duke vendosur zbrazjen e sallës dhe pas disa minutave ndeshja rifilloi, ku Prishtina vetëm se thelloi epërsinë dhe në fund fitoi kurorën e më të mirit për sezonin 2018/19. /Telegrafi/
