Mësohet arsyeja e largimit të Cancelos nga City: Raporti me Guardiolan është bërë i pariparueshëm

Joao Cancelo pritet të largohet nga Manchester City, si pasojë e një zënke me trajnerin Pep Guardiola gjatë stërvitjeve.

Mbrojtësi i krahut do të huazohet te Bayern Munichu, ndërsa arsyeja për këtë largim janë mospajtimet me strategun spanjoll – shkruan Daily Mail.

Ai kishte reaguar me nervozizëm pasi kishte mësuar se nuk do të përfshihej në njëmbëdhjetëshin startues në sfidën e FA Cup kundër Arsenalit që u zhvillua të premten mbrëma.

Cancelo ka qenë i zëshëm javët e fundit për mungesën e minutazhit të lojës dhe është bërë rëndues për skuadrën, derisa raporti i tij me Guardiolan u përkeqësua gradualisht pas Kampionatit Botëror.

28-vjeçari kërcënoi se do të largohej nga klubi dhe aq e rëndë ishte situata saqë City ia dha dritën e gjelbër për të gjetur klub të ri, meqenëse raportet mes lojtarit dhe trajnerit ishin të pariparueshme.

Lexo po ashtu Arrihet marrëveshja mes palëve, Joao Cancelo udhëton drejt Munichut për teste mjekësore te Bayerni

Bayerni e ka opsionin e nënshkrimit afatgjatë me portugezin në fund të sezonit për 61 milionë funte (69.5 milionë euro).

Cancelo ka pasur diskutime të nxehta me Guardiolan dhe ka startuar vetëm në tri nga 10 ndeshjet që kur u kthye nga detyra ndërkombëtare në Katar. Marrëdhënia me trajnerin ka qenë e tensionuar dhe është vërejtur në disa ndeshje, por ka arritur pikën e thyerjes para përballjes ndaj Topçinjve. /Telegrafi/