Merkel dhe Macron lënë “të vetme” kryeministren britanike, shijojnë birrat në një bar të Brukselit (Video)

Përderisa kryeministrja britanike “mbeti e vetme” pas një takimi tjetër të samitit, kancelaria gjermane, Angela Merkel, dhe presidenti francez Emmanuel Macron dhe pjesa tjetër e shokëve të tyre evropianë po shijonin birrat e famshme të qytetit.

Siç shkruan mediumi britanik, The Telegraph, përcjell Telegrafi, dy udhëheqësit më të fuqishëm të Evropës qëndruan jashtë duke pirë deri në orën 1 të mesnatës – kohë kjo e vlerësuar si “më e gjatë nga ajo që i ishte dhënë kryeministres britanike për të folur rreth Brexit-it”.

Ndërsa sipas Reuters, Angela Merkel, Emmanuel Macron dhe drejtuesit e Belgjikës dhe Luksemburgut habitën ata që kishin dalë në mbrëmje duke ndaluar në një bar në Bruksel për birrë dhe patate të skuqura, pas një mbrëmjeje të samitit rreth Brexit me kryeministren britanike, Theresa May.

Po sipas Reuters, përcjell Telegrafi, kancelaria gjermane dhe presidenti francez biseduan dhe shtrënguan duart me turistë dhe vendas në Grand Place piktoresk me mikpritësin e tyre lokal, kryeministrin belg Charles Michel dhe fqinjin e tij të Luksemburgut, Xavier Bettel, i cili tha se ai pagoi pijet për të festuar rizgjedhjen e tij si kryeministër të dielën.

Një gazetar kroat, i cili me kamerën e tij kapi katër liderët duke pirë birra, tregoi se ai foli me një grup vizitorësh që kishin një bisedë me Merkelin. Ata e pyetën atë për Brexit.

“Ju lutem, kjo është një mbrëmje e mrekullueshme”, u përgjigj ajo. “Le të mos e prishim”. /Telegrafi/