Meridian Express sërish mbështet fëmijët e SOS Fshatit përmes fushatës “Barazo Faturën”

Rrjeti më i madh i marketeve të lagjes në Kosovë, Meridian Express, për të katërtin vit me radhë përgjatë muajit të shenjtë të Ramazanit, në partneritet me SOS Fshatrat e fëmijëve vazhdojnë fushatën tradicionale ”Barazo Faturën”.

Kjo fushatë i mundëson të gjithë konsumatorëve të kontribuojnë për SOS Fshatin në gjithë rrjetin e dyqaneve Meridian Express.

Nëse fatura juaj është 4.97 euro, atëherë duke paguar pesë euro, ju dhuroni tre centë për fëmijët e SOS Fshatit. Që kampanja të jetë sa më transparente, secila shumë e dhuruar do të figurojë në faturën fiskale në formë të produktit.

“Për katër vjet rresht, konsumatorët e Meridian Express me mbështetjen e tyre i ndihmojnë fëmijët e SOS Kinderdorf. Këtë vit, kjo fushatë është edhe më domethënëse, meqë po ndodhë në muajin e Ramazanit, muajin e solidaritetit mes njerëzve, për t’i shtuar edhe më shumë kuptim ditëve dhe blerjeve në Meridian” ka thënë Yllka Mustafa Vejsa, menaxhere e marketingut në Meridian Express.

Kjo është një tjetër iniciativë domethënëse – traditë e rrjetit Meridian Express, duke ua mundësuar të gjithë konsumatorëve të kontribuojnë për fëmijët e SOS Fshatit.