Mavraj: Për Kosovën ishte ndeshje e vitit, ne i provuam lojtarët e rinj

Ndeshja miqësore ndaj Kosovës ishte një ndër ndeshjet më të dobëta në historinë e Kombëtares së Shqipërisë

Përfaqësuesja e Kosovës ishte bindshëm më e mirë se Kombëtarja e Shqipërisë duke dhuruar edhe spektakël në fushë.

E një rol të mirë për këtë paraqitje të dobët te Shqipëria sipas Mërgim Mavrajt luajtën edhe lojtarët e rinj të afruar së fundmi në Kombëtare.

Në konferencën për shtyp në Zvicër, ku kombëtarja shqiptare është grumbulluar, mbrojtësi kuqezi u shpreh se lojtarët e rinj nuk po dinë ta shfrytëzojnë mundësinë që Panucci u ka dhënë.

“Asnjëherë nuk ka qenë më e lehtë për t’u bërë lojtar i kombëtares se sa tani. Kur kam qenë unë i ri ka qenë një sakrificë e madhe për t’u ftuar, jo më për të qenë lojtar në formacionin e kombëtares”.

“Lojtarët e rinj këtë mundësi që po ua ofron trajneri ynë tani, nuk po dinë ta vlerësojnë. Impenjimin e kanë maksimal, nuk është se mund t’i gjykosh, por është një rast shumë i madh për ta”, u shpreh Mavraj.

Në fund Mavraj tha se për Kosovën kjo ndeshje ishte e vitit ndërsa Panucci iu dha hapësirë lojtarëve të rinj.

“Kosova e shihte si ndeshjen e vitit, ndërsa ne e morëm si një mundësi për të provuar të rinjtë, që të lidhen më mirë me pjesën tjetër të ekipi”.

“Përgjegjësinë për këtë humbje duhet ta marrin lojtarët, që kanë nderin të veshin fanellën kuqezi”, përfundoi Mavraj.

Ndeshjen e ardhshme miqësore Shqipëria e zhvillon përballë Ukrainës. /Telegrafi/