Matura shtetërore në Maqedoni do të vonohet, vazhdon greva e punonjësve të Qendrës Shtetërore të Provimeve

Vazhdon greva e punonjësve të Qendrës Shtetërore të Provimeve (QSHP), pas dy takimeve të pasuksesshme me ministritë e Financave dhe të Arsimit. Sipas punonjësve të QSHP, është e pamundur të realizohen provimet e maturës shtetërore në përputhje me datat dhe kjo do të thotë zgjatje e kohës në të cilën do të shpallen rezultatet.

Ata thonë se kanë marrë një ofertë të papranueshme nga Ministria e Financave për rritje të pagave për rreth një mijë denarë, ndërsa takimi i dytë me përfaqësues të Ministrisë së Arsimit dhe Ministrisë së Financave është mbajtur të enjten e kaluar, përcjell Telegrafi Maqedoni.

“Kemi pasur dy takime të pasuksesshme. E fundit ishte me ministrin e Arsimit, në prani të një personi nga Ministria e Financave. Nuk morëm asgjë të re në atë takim. Propozimi i Ministrisë së Financave është rritje prej gati 1000 denarë dhe se këto janë vijat e kuqe të tyre”, tha Emilia Boshkovska, kryetare e Organizatës Sindikale në QSHP.

Sipas saj, ka punonjës që në vend të grevës vazhduan t’i kryejnë detyrat e tyre, por shumica ende nuk punojnë deri në ngritjen e pagave.

Greva e Qendrës Shtetërore të Provimeve hyn në javën e tretë. Ata më 24 prill njoftuan se 11 nga gjithsej 29 punëtorë, të cilët janë në pozita të ndryshme, janë të barabartë dhe marrin pagë minimale prej 20.000 denarë, janë në grevë. Organizata sindikale e Qendrës Shtetërore të Provimeve ka njoftuar se do të jetë në grevë deri në marrjen e pëlqimit të Ministrisë së Financave për rritjen e pagave./Telegrafi/