Maloku: AKR-ja është dështim politik e Pacolli i dështuar politik

Ish-përfaqësuesi i AKR-së në KQZ, sociologu Fadil Maloku ka folur për partinë ku ka qenë anëtar, duke thënë se AKR-ja është dështim politik dhe Pacolli i dështuar politik.

“AKR-ja është një dështim politik, Behgjet Pacollin e kam mik dhe jam i lidhur me të familjarisht, por ai njeri është i dështuar politikisht dhe dështoi politikisht”, ka thënë Maloku duke shtuar se AKR ka mbajtur postin e zëvendëskryeministrit dhe nuk kanë bërë asgjë, të paktën në hapjen e një fabrike.

Ai thotë se AKR-ja nuk do të kthehet në Kuvend, transmeton Koha.net.

Në lidhje me sjelljen e Behgjet Pacollit me Mimoza Kusari-Lilën, ai ka thënë se Pacolli nuk dinë të menaxhojë në politikë, edhe pse në biznes është shumë i zoti.
Maloku ka thënë se që nga viti 2008 në Kosovë ka pasur skandale dhe sjellje devijante, duke krijuar gjendje jo të mirë.

“Nga 2008 e më tej, përveç skandaleve dhe sjelljeve devijonte kanë krijuar papunësi shumë të mëdha e varfëri enorme”, ka thënë Maloku.

Për Malokun është indiferenca qytetare, ajo që ngjall interes, transmeton Koha.net.

“Kam përshtypje manipulimi në mënyrë mjeshtërore me e përfeksionu skajshmërisht thënien e Makiavelit ‘Qëllimi arsyeton mjetin’, duke i përdorë mediet, veçanërisht mediumit publik”, ka thënë Maloku në “Interaktiv” të KTV-së, duke shtuar se pas kësaj dalin në pah krimi e korrupsioni.

Si rezultat e kësaj, Maloku thotë se vonohet demokratizimi i vendit.