Lëndohet një 20 vjeçar nga një shpërthim në shtëpinë e tij në Gjakovë, policia dyshon për mjete tjera të pashpërthyera

Një 20 vjeçar nga Gjakova ka pësuar lëndime të rënda për shkak të shpërthimit të një mjeti shpërthyes.

Rasti ka ndodhur rreth orës 01:20 pas mesnate. Kështu ka bërë të ditur për Telegrafin zëdhënësi i policisë për rajonin e Gjakovës, Sheremet Elezaj.

Elezaj ka bërë të ditur se shpërthimi ka ndodhur në shtëpinë e viktimës.

“Sot, rreth orës 01:20, një mashkull rreth 20 vjeç është dërguar për trajtim mjekësor si pasojë e lëndimeve të rënda të shkaktuara nga një mjet shpërthyes. Menjëherë në vendngjarje kanë dalë të gjitha njësitë relevante policore, dhe sipas hetimeve fillestare, dyshohet se viktima, aksidentalisht ka shkaktuar shpërthimin e mjetit në shtëpinë e tij, në fshatin Dobrigje-Gjakovë”, ka thënë Elezaj.

Ai ka shtuar se për rastin është njoftuar prokurori i shtetit, në konsultim me të cilin është iniciuar rast “shkaktim i rrezikut të përgjithshëm.”

Ndërkaq drejtori i policisë në Gjakovë, Lumni Graishta tha për Telegrafin se ende nuk kanë arritur të ekzaminojnë vendin e ngjarjes për shkak të dyshimit që mund të ketë mjete tjera shpërthyese.

“Nuk kemi arritur ende me ekzaminu vendin e ngjarjes për shkak të dyshimit që mund të ketë mjete tjera të pashpërthyera. Për momentin EOD janë duke kontrolluar zonën”, ka thënë Graishta. /Telegrafi/