Lëndohet lojtari më i pasur në botë, futbollisti me 20 miliardë euro pasuri

Faiq Bolkiah, futbollisti më i pasur në botë me rreth 20 miliardë euro pasuri pasi është nipi i Sulltanit të Bruneit, është shtruar në spital pasi pësoi një dëmtim në këmbë gjatë një ndeshjeje në Premier Ligën Tajlandeze.

Nipi milioner i Sulltanit të Bruneit, i cili në Evropë ka luajtur në ekipet e të rinjve të Maritimo (Portugali), Leicester City (Angli), Southampton (Angli) dhe Chelsea (Angli), aktualisht luan për klubin tajlandez, Ratchaburi.

Faiq Bolkiah, i cili është 25 vjeç, u lëndua pasi hyri në fushë si zëvendësues në pjesën e parë në ndeshjen midis Ratchaburi dhe Police Tero në stadiumin Boonyachinda.

#NSTsports Faiq Bolkiah, the world's richest footballer, has been admitted to the hospital after sustaining a serious injury during the Thai League 1 match between Ratchaburi and Police Tero.https://t.co/soqDXsGXfL

— New Straits Times (@NST_Online) February 20, 2024

Tanawat Nitikanchana, president i Ratchaburi, raportoi për shëndetin e Faiq Bolkiah, duke u ndier fillimisht i trishtuar, por edhe donte t’i dërgonte një mesazh inkurajimi për lojtarin.

“Sot është dita më e trishtuar. Vëllai im, Princi Faiq Jefri Bolkiah u lëndua duke luajtur për ne”, ka thënë fillimisht Nitikanchana.

“Unë e di që duhet të jeni në shok dhe në dhimbje të madhe tani, por duhet ta dini se ne do të jemi me ju në çdo hap të rrugës derisa të vishni sërish fanellën e Ratchaburit me dragua dhe të shënoni gola për ne përsëri”.

“Edhe pse ke vetëm tetë muaj këtu me ne, jam i sigurt që të gjithë në klub dhe tifozët të duan. Do të presim ditën kur të kthehesh më i fortë se kurrë, djalosh”, përfundoi presidenti i Ratchaburit. /Telegrafi/