Laboratori i toksikologjisë në IML që 17 vjet pa akreditim, Haliti: Jemi në përgatitje të procesit për të vazhduar në qershor

Laboratori i Toksikologjisë i cili është në kuadër të Institutit të Mjekësisë Ligjore (IML) i cili funksionon që nga viti 2006 ende ka mbetur pa u akredituar.

Ky laborator që nga funksionimi i saj po i bën 17 vite punë pa akreditim.

E, për akreditimin e këtij laboratori, nga Ministria e Drejtësisë kishin bërë të ditur se aplikimi për fillimin e procesit të akreditimit ishte bërë më 27.10.2022 në Drejtorinë e Akreditimit të Kosovës, mirëpo ky proces është pezulluar për shkak të situatës së krijuar pas zhdukjes së mostrave të rastit Dehari.

Kështu ka bërë të ditur në një përgjigje dërguar Telegrafit në mënyrë elektronike ushtruesi i detyrës së Institutit të Mjekësisë Ligjore (IML), Ditor Haliti.

Sipas tij, procesi për akreditimin e këtij laboratori do të vazhdojë nga muaji qershor.

“Për shkak të situatës së krijuar pas zhdukjes së mostrave të rastit Dehari në dhjetor të 2022, ky proces është pezulluar dhe tani jemi në përgatitje për të vazhduar me këtë proces nga muaji qershor”, ka thënë Haliti.

Lexo po ashtu Brenda laboratorit të toksikologjisë të Institutit të Mjekësisë Ligjore – aty ku ende nuk kryhen analizat kuantitave të drogave dhe barnave

Ndryshe, laboratori i toksikologjisë i cili është brenda Institutit të Mjekësisë Ligjore (IML) funksionin që nga viti 2006, në të cilën kryhen analiza kuantitative dhe kualitative të alkoolit. Ndërsa, analizat kuantitative të substancave narkotike dhe medikamenteve mjekësore nuk kryhen në këtë laborator për rastet e autopsisë në këtë institut.

Analizat e kryera në laboratorin e toksikologjisë janë të një rëndësie të veçantë, pasi shërbejnë si dëshmi për rastet e ndryshme të veprave penale në procese gjyqësore.

Ndërkaq, Telegrafi do të ju mbaj të informuar rreth të gjitha zhvillimeve në Institutin e Mjekësisë Ligjore (IML). /Telegrafi/