“Ky ekip i Realit nuk është Galacticos”, Seedorf nis një debat në lidhje me ekipin aktual të Los Blancos

Futbollisti legjendar holandez, Clarence Seedorf ka zbuluar dallimin mes Real Madridit të famshëm të njohur si “Galacticos” dhe skuadrës së sotme që dominon futbollin evropian dhe atë botëror.

Galacticos është një term i përdorur për t’iu referuar skuadrës së famshme të Real Madridit njëzet vjet më parë, kur yjet më të mëdhenj të botës luanin për klubin, duke përfshirë Ronaldo ‘Fenomeni’, Raul Gonzalez, Zinedine Zidane, Luis Figo, Roberto Carlos, Davin Beckham dhe shumë të tjerë.

Megjithatë, skuadra e sotme e Real Madridit nuk ka aq shumë yje të futbollit botëror, por ka edhe më shumë sukses se Galacticos.

Arsyeja, sipas legjendës Seedorf, është se skuadra e sotme është më e mirë si ekip se Galacticos, edhe pse nuk ka aq shumë yje në listë.

“Unë nuk mendoj se mund ta quajmë këtë ekip të Realit “Galacticos”. Këta janë lojtarë shumë të mirë, por besoj se janë të suksesshëm mbi të gjitha sepse janë një ekip i mirë”, ka thënë fillimisht Seedorf.

“Ajo që mund të shoh nga Reali i sotëm është më shumë se individë, një ekip që dinë të punojnë për njëri-tjetrin, ata dinë të vuajnë së bashku në disa ndeshje dhe ky është ndryshimi”, përfundoi ish-ylli i Real Madridit.

Deklarata e holandezit ka ndezur debate në rrjetet sociale ku tifozët japin mendimin e tyre se cili skuadër e Real Madridit është më e mirë, skuadra e sotme e drejtuar nga Bellingham, Mbappe dhe Vinicius Jr apo ajo e vjetra me Zidane, Ronaldo dhe Figo.

Seedorf e njeh shumë mirë skuadrën e Real Madridit sepse ishte anëtar i saj dhe fitoi Ligën e Kampionëve me Mbretërit.

Ai mbahet mend si i vetmi futbollist që ka fituar Ligën e Kampionëve me tre klube të ndryshme (Milan dy herë, Ajax dhe Real Madrid). /Telegrafi/