Kush është Roberto Moreno, trajneri i cili po flitet që do marrë drejtimin e Kosovës?

I lindur në shtator të vitit 1977, Roberto Moreno mori hapat e parë në karrierën e tij si trajner që në moshë të hershme.

Moreno e nisi karrierën e tij profesionale si trajner në vitin 2003, duke drejtuar fillimisht disa klube lokale në vendlindjen e tij në qytetin e L’Hospitalet (qytet në Kataloni).

Pasi punoi si skaut i Barcelonës përgjatë sezonit 2010/2011, Moreno punoi si ndihmëstrajner i Luis Enriques tek Roma në sezonin 2011/2012, tek Celta Vigo në sezonin 2013/2014 dhe tek Barcelona në një periudhë trevjeçare (2014-2017).

Në mars të vitit 2019, Moreno mori drejtimin e Spanjës pas largimit të Luis Enriques për arsye personale.

Më datë 26 mars 2019, Moreno bëri debutimin e tij në stolin e “Furisë së Kuqe” në një fitore me rezultat të pastër 2-0 ndaj Maltës. Ai drejtoi edhe dy sfida tjera pas kësaj, ndaj Ishujve Faroe dhe Suedisë.

Pas tri ndeshjesh në krye të Spanjës si trajner i përkohshëm, Moreno u emërua si kryetrajner i ekipit më datë 19 qershor të vitit 2019, pasi Luis Enrique dha dorëheqje për shkak të sëmundjes së vajzës.

Lexo po ashtu FFK-ja takohet me Roberto Morenon, njëri nga kandidatët për të marrë drejtimin e Kosovës

Pas aventurës me Spanjën, më datë 28 dhjetor 2019 ai mori drejtimin e ekipit francez të Monacos, duke zëvendësuar Leonardo Jardim.

Ai fitoi ndeshjen e tij të parë me rezultat 2-1 ndaj Reims në Kupën e Francës, ndërsa në ligë e ndali me barazim 3-3 liderin Paris Saint-Germain.

Moreno u rikthye përsëri në Spanjë, kësaj radhe tek Granada aty ku nënshkroi një kontratë dyvjeçare.

Fatkeqësisht, aventura e tij me klubin spanjoll nuk shkoi sipas parashikimeve dhe ai u shkarkua pas një viti për shkak se kishte gjashtë humbje në shtatë ndeshje.

Rekordi i Roberto Morenos si trajner:

Ndeshje: 51

Fitore: 18

Barazime: 15

Humbje: 18

Gola të shënuar: 82

Gola të pësuar: 69

/Telegrafi/