Kurti vizitoi fermën e familjes Abazi, në fshatin Keqekollë të Prishtinës

Kryeministri në detyrë i Republikës së Kosovës, Albin Kurti ka vizituar sot fermën e familjes Abazi, në fshatin Keqekollë të Prishtinës.

Në njoftimin e bërë nga zyra e kryeministrit thuhet se ferma e familjes Abazi ka 12 lopë qumështore, 8 viça, 300 pula e shpezë të tjera dhe 12 hektarë tokë të punueshme me grurë, miser dhe livadhe, transmeton Telegrafi.

“Përkrahja prodhimeve ushqimore vendore nga ferma deri në konsum është e rëndësishme për mirëqeniet e familjeve, zhvillimin lokal e atë rural. Fermat e vogla dhe me llojshmëri të ndryshme të produkteve duhet të kenë mbështetje edhe më shumë.

Përballja me pandemi, na ka rikujtuar rëndësinë e prodhimit vendor. Prandaj, këtë përballje duhet ta shohim edhe si një rast të mirë për riorientim të ekonomisë sonë. Përmes Pakos për Rimëkëmbjen Ekonomike dhe politikave përcjellëse, ne, nuk do të synojmë vetëm kthimin në gjendjen e mëhershme, por do ta synojmë edhe zhvillimin e mëtutjeshëm të saj”, thuhet në njoftim./Telegrafi/