​Kurti: Po përmbushet funksionalizimi i Institutit për dokumentimin e krimeve të kryera gjatë luftës në Kosovë

Kryeministri Albin Kurti, ka bërë të ditur se procesi i funksionalizimit të Institutit për dokumentimin e krimeve që u kryen gjatë luftës së fundit në Kosovë po përparon si detyrë e përmbushur.

Mesazhi i tij erdhi përmes një postimi në llogarinë zyrtare në Facebook, ku ai gjithashtu shpërndau një video që tregon momente nga ceremonia e pranim dorëzimit të dokumenteve të para.

Ndërsa shprehu mirënjohjen e tij ndaj familjarëve të personave të zhdukur, Kurti pohoi rëndësinë e këtij instituti si përgjegjësi historike.

“Funksionalizimi i Institutit për dokumentimin e krimeve të kryera gjatë luftës në Kosovë është një obligim që po përmbushet ndaj kujtesës sonë si popull dhe ndaj kërkesës sonë për drejtësi,” shkroi Kurti.

Në vizitën e bërë në 16-vjetorin e Pavarësisë së Kosovës, Kurti ishte i shoqëruar nga Drejtori Ekzekutiv i Institutit, z. Atdhe Hetemi, dhe z. Ahmet Grajçevci, Kryetar i Këshillit Koordinues të Asociacioneve Familjare të të Zhdukurve të Kosovës.

“Falënderoj z. Grajçevcin dhe asociacionet e familjarëve të të zhdukurve për angazhimin e tyre ndër vite, për dokumentimin e krimeve të zhdukjeve me dhunë nga Serbia,” shtoi ai.

Projektligji për themelimin e këtij instituti u miratua nga Qeveria e Kosovës më 16 shtator dhe më pas edhe nga Kuvendi i Kosovës.

Instituti ka për qëllim hulumtimin dhe dokumentimin e krimeve të kryera në periudhën nga 1 janari 1998 deri më 20 qershor 1999, duke u dhënë një bazë ligjore dhe institucionale përpjekjeve të vendit për drejtësi dhe të vërtetë historike./Telegrafi/