Kurti për “dokumentin zyrtar që tregon se si Serbia vrau Ukshin Hotin”: Urgjentisht të merren hapat e duhur për të përcaktuar vërtetësinë e tij

Lideri i Lëvizjes Vetëvendosje, Albin Kurti, ka reaguar ndaj një dokumenti që po qarkullon në mediat në Kosovë, i cili thuhet se ka rrjedhur nga Ministria e Punëve të Brendshme e Serbisë.

Sipas Kurtit, janë të pamohueshme krimet makabre që Serbia ka kryer në Kosovë gjatë luftës.

Por në këtë rast, ka shtuar ai, organet relevante në Kosovë (Ministria e Drejtësisë e Kryeministria, Departamenti për Krime Lufte i Prokurorisë Speciale, dhe Komisioni Qeveritar për Persona të Zhdukur), urgjentisht duhet të koordinohen dhe të marrin hapat e duhur që të përcaktojnë vërtetësinë e kësaj informate kaq të rëndësishme.

Lexo po ashtu RTK publikon “dokumentet zyrtare që tregojnë se si Serbia vrau Ukshin Hotin”

“Informacione të tilla shkaktojnë dëm të vazhdueshëm emocional dhe psikologjik te familja e Ukshin Hotit, tek ata që e njohën dhe e duan, dëm ky që vjen direkt si rezultat i krimeve të kryera nga Serbia”, ka shkruar Kurti.

Andaj, ai thotë se familja dhe e gjithë shoqëria meriton përgjigje, ashtu siç meritojnë të gjitha familjet e secilit person që ende mungon.

“Kosova duhet t’i ketë prioritet krimet e kryera gjatë luftës”, ka thënë më tej Kurti, duke shtuar se kjo situatë duhet të na kujtojë kolektivisht që është e papranueshme bërja e pazareve në bisedime me Serbinë, për më shumë që vijon të ngelet i pasqaruar fati i të zhdukurve.

“Është momenti i fundit që Kosova të tregojë seriozitetin e saj në raport me ballafaqimin me të kaluarën”, ka thënë në fund të shkrimit të tij, Albin Kurti.

Postimi i plotë i Kurtit në Facebook:

Ka disa orë që në publik po qarkullon një dokument që thuhet se ka rrjedhur nga Ministria e Punëve të Brendshme të Serbisë.

Sipas këtij dokumenti aludohet se Ukshin Hoti është vrarë, e më pas kufoma e tij është djegur me eksploziv dhe më tej është fshehur për të humbur gjurmët e krimit.

Janë të pamohueshme krimet makabre që Serbia ka kryer në Kosovë gjatë luftës.

Por në këtë rast, organet relevante në Kosovë (Ministria e Drejtësisë e Kryeministria, Departamenti për Krime Lufte i Prokurorisë Speciale, dhe Komisioni Qeveritar për Persona të Zhdukur), urgjentisht duhet të koordinohen dhe të marrin hapat e duhur që të përcaktojnë vërtetësinë e kësaj informate kaq të rëndësishme.

Informacione të tilla shkaktojnë dëm të vazhdueshëm emocional dhe psikologjik te familja e Ukshin Hotit, tek ata që e njohën dhe e duan, dëm ky që vjen direkt si rezultat i krimeve të kryera nga Serbia.

Kjo çka po i bëhet familjes Hoti me informacione të tilla, është viktimizim i vazhdueshëm.

Familja dhe e gjithë shoqëria meriton përgjigje, ashtu siç meritojnë të gjitha familjet e secilit person që ende mungon.

Kosova duhet t’i ketë prioritet krimet e kryera gjatë luftës.

Kjo situatë duhet të na kujtojë kolektivisht që është e papranueshme bërja e pazareve në bisedime me Serbinë, për më shumë që vijon të ngelet i pasqaruar fati i të zhdukurve.

Është momenti i fundit që Kosova të tregojë seriozitetin e saj në raport me ballafaqimin me të kaluarën. /Telegrafi/