Kurti: Krimi mbi Astritin, duhen hetuar njerëzit përgjegjës

Lideri i Vetëvendosjes, Albin Kurti ka thënë se nevojitet hetim i ri pavarur e profesional, për ta ndriçuar plotësisht krimin ndaj Astrit Deharit.

Duke komentuar konstatimet e ekspertëve të mjekësisë ligjore nga Instituti i Lozanës në Zvicër, Kurti ka thënë se ata kanë konstatuar përfshirjen e personi/ave të tretë.

Lexo po ashtu Reagimet pas publikimit të raportit për rastin Dehari, kërkohet drejtësi

Postimi i plotë:

Ekspertët e mjekësisë ligjore nga Instituti i Lozanës në Zvicër e kanë përjashtuar mundësinë e vetëvrasjes së Astrit Deharit. Raporti i tyre është shkencor dhe i hollësishëm për nga metoda dhe të gjeturat. Ata kanë konstatuar përfshirjen e personi/ave të tretë.
Nevojitet hetim i ri, i pavarur e profesional, për ta ndriçuar plotësisht këtë krim. Jo vetëm mbi faktet e provat materiale. Sepse, duhen hetuar e shqyrtuar rrethanat fizike dhe të tjera të krimit, si dhe procesi i deritanishëm hetues. Sepse, duhen hetuar njerëzit përgjegjës, çka kanë bërë, si e kanë bërë dhe çka nuk kanë bërë.
Krimit mbi Astritin në duar të shtetit para tri vjetëve i është shtuar padrejtësia e shtetit tash e tri vjet. Drejtësia për Astritin nuk ka alternativë. Është në pyetje asgjë më pak se e drejta për jetë e qytetarit të Republikës. /Telegrafi/