Kërkesa e Mehajt për bazë të përhershme ushtarake amerikane, merr jehonë në mediat botërore

Ministri i Mbrojtjes Armend Mehaj ka kërkuar që të ndodh anëtarësimi i përshpejtuar i Kosovës në NATO dhe vendosja e Bazës së Përhershme të Forcave Amerikane në Kosovë.

Ai ka thënë se kjo është nevojë imediate për garantimin e paqes, sigurisë dhe stabilitetit në Ballkanin Perëndimor dhe më gjerë.

Mehaj ka thënë se këto kërkesa janë të bazuara në realitetin e krijuar pas agresionit ushtarak të Rusisë në Ukrainë.

Kjo kërkesë e ministrit Mehaj është pasqyruar në mediat ndërkombëtare.

Fillimisht agjencia prestigjioze e lajmeve Reuters ka shkruar për kërkesën e Mehaj, e cila më pas bëri jehonë edhe në mediat tjera.

Lexo po ashtu Pas agresionit rus në Ukrainë, Mehaj kërkon bazë të përhershme ushtarake amerikane në Kosovë

Reuters pasi ka transmetuar deklaratën e Mehajt, ka kujtuar se Amerika në Kosovë ka 635 ushtarë të cilët në kuadër të misionit të NATO-s ruajnë “paqen e brishtë” në këtë pjesë të Ballkanit.

Agjencia me bazë në Londër poashtu kujton se Kosova është rreshtuar krahë vendeve tjera perëndimore duke vendosur sanksione ndaj Rusisë.

“Mehaj ka thënë se Qeveria e Kosovës ishte gati të ofronte ndihmë për çdo operacion ushtarak në Ukrainë, po të kërkohej nga Uashingtoni”, raporton tutje Reuters.

Pavarësia e Kosovës e shpallur në vitin 2008 është njohur nga më shumë se 110 vende, kryesisht nga bota perëndimore, por ende nuk është njohur nga Serbia apo aleatja e saj tradicionale Rusia.

Katër anëtarë të NATO-s poashtu refuzojnë të njohin pavarësinë e Kosovës.

Për shkak të drejtës së vetos nga Rusia, Kosova ende nuk ka arritur anëtarësimin në OKB, shkruan tutje Reuters.

Raportim për këtë kërkesë të Kosovës ka bërë edhe media tjetër e njohur Al Jazeera.

BREAKING: Kosovo asks the US to establish a military base on its territory, to seek faster membership of NATO

— The Spectator Index (@spectatorindex) February 27, 2022

Media e njohur australiane në Twitter që ka më shumë se 2 milion ndjekës, The Spectator Index poashtu e ka konsideruar si lajm të orëve të fundit kërkesën e Kosovës për bazë të përhershme ushtarake amerikane.

Edhe analisti dhe komentatori i ngjarjeve gjeopolitike Samuel Ramani, i cili shkruan vazhdimisht për media prestigjioze ndërkombëtare si Washington Post, Huffington Post, Jerusalem Post, Radio Evropa e Lirë etj. i ka bërë jehonë deklaratës së Mehajt.

BREAKING: Kosovo asks the US for a permanent military base and requests NATO membership

— Samuel Ramani (@SamRamani2) February 27, 2022

“Anëtarësimi i Kosovës në NATO do të ishte mënyrë efikase për t’iu përgjigjur Putinit”, ka shkruar Ramani. /Telegrafi/