Katy Perry tregon sekretin si i menaxhon komentet negative

Katy Perry ka ndarë këshillën e çmuar që terapisti i saj i dha për të përballuar komentet negative mbi muzikën e saj.

Sipas saj, sekreti është të mos i marrësh parasysh fare. “Nuk duhet t’i lexosh as kur janë të mira, as kur janë të këqija”, tha ajo për ‘People’, duke theksuar se mendimi i të tjerëve nuk duhet të ndikojë te vetëvlerësimi.

Albumi i saj i fundit, ‘143’, nuk pati suksesin komercial të projekteve të mëparshme, por këngëtarja mbetet krenare për të, shkruan DailyMail.

“E krijova nga një moment i rëndësishëm në jetën time si nënë. Mesazhet e tij festojnë dashurinë dhe energjinë femërore”, u shpreh ajo.

Perry, e cila ka një vajzë 4-vjeçare me aktorin Orlando Bloom, shprehu gëzimin për mëmësinë, duke e krahasuar ndjesinë me “rikthimin e magjisë së Krishtlindjeve”.

Ajo njoftoi gjithashtu se Daisy do ta shoqërojë në turneun e saj ‘Lifetimes’, i cili nis në prill 2025 në Meksikë dhe do të vijojë në Australi e Mbretërinë e Bashkuar.

“Koha fluturon! Jam e emocionuar ta prezantoj atë me botën dhe të ndajmë aventura së bashku”, tha ajo për ‘The Sun’, duke shtuar se në ditët e pushimit planifikon t’i çojë nëpër parqe dhe aktivitete argëtuese.

Turneu i Perry-t do të ndalet në qytete si Londra, Glasgow dhe Manchester, duke premtuar një spektakël të paharrueshëm për fansat e saj. /Telegrafi/