Kai Havertz u aktivizua për Gjermaninë në një pozicion të pazakontë

Kai Havertz ka pasur vështirësi për t’u adaptuar tek Arsenali por ai ka shënuar edhe një herë tjetër për Gjermaninë, madje kësaj radhe duke luajtur si mbrojtës i majtë.

24-vjeçari nuk ka arritur të lë shenja të mëdha në sezonin debutues me Arsenalin, që kur ata e transfruan gjermanin nga rivalët e qytetit, Chelsea.

Ai ka shënuar vetëm një gol për klubin në 19 paraqitje, ani pse ka luajtur më shumë si mesfushor nën urdhrat e Mikel Artetas.Havertz e ka shpenzuar pjesën më të madhe të karrierës së tij tek Chelsea duke luajtur si sulmues, andaj ai tani duhet të adaptohet në një pozicion krejtësisht të ri te Arsenali.

Trajneri i Gjermanisë, Julian Naglesmann, bëri diçka të pazakontë mbrëmjen e së shtunës, duke e aktivizuar atë si mbrojtës i majtë ndaj Turqisë.

Duke folur paraprakisht, Naglesmann tha se “Kai nuk do të luajë gjithmonë në këtë pozicion”.

“Unë kam një ide të mrekullueshme, ai është një futbollist jashtëzakonisht i mirë. Ky është një opsion shumë i mirë. Ai nuk do të luajë gjithmonë si një mbrojtës i majtë klasik”, ka thënë Nagelsmann.

Pavarësisht këtij vendimi të trajnerit, Havertzit i mjaftuan vetëm pesë minuta për të gjetur rrugën e rrjetës në një miqësore luksi.

Ai shfrytëzoi për mrekulli pasimin e Leroy Sane, për të shënuar golin e tij të 14-të për kombëtaren e Gjermanisë./Telegrafi/