Jashari: Deklaratat e Imer Imerit kanë dëmtuar UÇK-në

Kryetari i shoqatës së Familjarëve të Dëshmorëve, Xhavit Jashari ka deklaruar se deklaratat e vëllait të aktivistit të vrarë të LDK-së, Haki Imeri kanë dëmtuar luftën e Ushtrisë Çlirimtare të Kosovës (UÇK).

Mbrëmjen e së hënës, ishte Imer Imeri ai i cili kishte deklaruar se ish-presidenti Hashim Thaçi kishte vrarë shqiptarë.

Lidhur me këtë, Jasharaj ka deklaruar se i njëjti kishte bërë edhe propagandë ndaj luftës së UÇK-së.

“Të gjithë jemi të interesuar që çdo vrasje që ka ndodhur në Kosovë të ndriçohet mirëpo Imer Imeri dhe çiftet e tij siç është edhe ai avokati, janë njerëz që edhe gjatë luftës së UÇK-së me deklarata të tilla e kanë dëmtuar luftën e UÇK-së. Në një periudhë kohore kanë bërë edhe propagandë të jashtëzakonshme ndaj luftës së UÇK-së duke i cilësuar madje edhe në mërgatë edhe në Evropë që këta janë hajdutë”, ka deklaruar ai në “Debat Plus”.

Lexo po ashtu Imeri për vdekjen e ish-aktivistit të LDK-së: Vrasësit i dimë, urdhëruesit janë tani në proces

“Le të ndriçohen vrasjet, por jo gjithçka që ka ndodhur t’i atribuohet Ushtrisë Çlirimtare të Kosovës”, deklaroi tutje kryetari i shoqatës së Familjarëve të Dëshmorëve të UÇK-së.

Nga ana tjetër, Jashari ka komentuar edhe procesin gjyqësor të ish-krerëve të UÇK-së në Hagë.

Ai ka thënë se dihej qysh në vitin 2015 që një gjykatë e tillë do të ishte e njëanshme, e dëmshme dhe jo vetëm.

Lexo po ashtu Tha se Jakup Krasniqi ka dorë në vrasjen e Xhevat Isufit, reagon i biri i tij: Imer Imeri është duke shpifur, është një gënjeshtër e kulluar

“Faktikisht edhe sot këtë proces e kemi parë ne si organizata të dala nga lufta siç e kemi parë krijimin e kësaj gjykate më 2015. Ju e dini që atëherë ne e kemi protestuar që mos të jepet mundësia të krijohet një gjykatë e tillë sepse atëherë kemi konsideruar, duke u bazuar edhe në e gjykatat të tjera pas luftës…dhe e kemi ditur që do të jetë e dëmshme, selektive, e njëanshme dhe me shpifje e me akuza siç po del e po vërtetohet në vazhdimësi të inskenuara dhe të përpunuara në Serbi e në Beograd. Nuk është diçka e re që sulmohet UÇK-ja, në këtë rast bartësit dhe udhëheqësit e saj por është shqetësuese me terminologjinë që përdor në aktakuzë pra, si një organizatë e përbashkët kriminale…”, ka deklaruar Jasharaj.