Ismaili: Nis transformimi farmaceutik në QKUK, 90 barnatore të reja

Ministri i Shëndetësisë, Uran Ismaili, ka njoftuar se Qendra Klinike Universitare e Kosovës (QKUK), do të bëhet me rreth 90 barnatore të reja në kuadër të transformimit farmaceutik që është nisur atje.

Ismaili këtë deklaratë e bëri në rrjetin e tij social Facebook, duke shkruar se ky transformim ka nisur pasi që për 20 vjet nuk ka pasur asnjëherë sistem të mirëfilltë se si janë menaxhuar barnat në QKUK.

Ai ka njoftuar se çdo repart i QKUK-së do të ketë barnatoren e saj, të monitoruar me sistem elektronik, kamera dhe dyer me qasje të kufizuar, që çdo ilaç i blerë të shkoj deri te pacienti.

“Për 20 vjet nuk ka pasur asnjëherë asnjë sistem të mirëfilltë se si janë menaxhuar barnat në QKUK. Barnat që janë blerë, jo gjithherë kanë arritur deri te pacienti. Për më tepër, këto janë “barnatoret” e vjetra në të cilat janë mbajtur ilaçet, pa asnjë siguri dhe asnjë kriter për ruajtjen e tyre. Prandaj është nisur “Transformimi Farmaceutik”, që përmban 14 barnatore klinike dhe rreth 90 barnatore të reparteve. Çdo barnatore do të jetë e monitoruar me sistem elektronik, kamera, barkode dhe dyer me qasje të kufizuar. Çdo ilaç i blerë do të shkojë deri te pacienti. #BashkëeNdreqim”, ka shkruar Ismaili në Facebook. /Telegrafi/