Ish-i burgosuri Zogaj tregon tmerret që kishte përjetuar nga gardiani Milenkoviq: Më ka torturuar derisa e kam humbur vetëdijen

I mbijetuari i masakrës së Burgut të Dubravës, Bislim Zogaj, ka rrëfyer për tmerret që ka përjetuar nga gardiani Dragisha Milenkoviq, gjatë periudhës së luftës në Burgun e Prishtinës, i cili tash po hetohet për krime lufte.

Gjatë ditës së enjte, Gjykata Themelore në Prishtinë ka bërë të ditur se ia ka caktuar masën paraburgimit prej 30 ditësh, Dragisha Milenkoviqit për shkak të dyshimit të bazuar se ka kryer veprën penale Krime lufte kundër popullatës civile.

Ai po dyshohet se torturoi të burgosurit shqiptarë.

Lexo po ashtu ​Një muaj paraburgim për Dragisha Milenkoviqin, i dyshuar për krime lufte në Kosovë

Ai dyshohet se torturoi të burgosurit shqiptarë dhe për këtë ka rrëfyer Bislim Zogaj, duke theksuar se Milekoviq ka qenë njëri nga gardianët më të tmerrshëm.

Zogaj ka treguar për torturat që i ka pësuar nga Milenkoviqi.

“Ka qenë njëri nga gardianët më të tmerrshëm, jo vetëm me mua por edhe me të burgosurit tjerë politik. Por, në veçanti mund të flasë për vetën, për maltretimet dhe për torturat që kam pasur me të. Bile për ta cekur një rast, ku më ka nxjerrur nga dhoma dhe atëherë e përdroshin një strategji gardianët serbë, i torturonin të burgosurit në korridor për të ua shti tmerrin të burgosurve të tjerë. Kështu edhe mua më ka tërhequr nga dhoma dhe për afër një orë më ka torturuar në mënyrë më çnjerëzore. Disa herë e kam humbur vetëdijen dhe më ka lagur me ujë për të ma kthyer vetëdijen dhe më ka kthye në dhomë”, tha Zogaj në “Five” të RTV Dukagjini.

“Në momentin kur jam kthyer në dhomë një shok, që isha së bashku më të në dhomë nga tmerri që kishte dëgjuar, nga goditjet ndaj meje, nuk mund ta shihja, sepse gjatë gjithë kohës kishte pirë duhan dhe dhoma ishte mbushur e tëra në tym për shkak të sikletit që kishte duke dëgjuar se çka më bëhej mua”, ka thënë Zogaj. /Dukagjini/