Inspektorati i Prishtinës dhe MBZHR-ja me aksion në afërsi te Tregu i Veturave

Drejtoria e Inspekcionit në Prishtinë ka zhvilluar një aksion, i cili ka nisur në orët e hershme të mëngjesit, për lirimin e hapësirave publike në rrugët në afërsi të Tregut të Veturave.

Inspektorati i kësaj komune e ka cilësuar aksion të madh këtë zhvillim.

“Që nga orët e hershme të mëngjesit Drejtoria e Inspektoratit – Komuna e Prishtinës ka zhvilluar një aksion i madh në koordinim edhe me policinë e Kosovës me qëllim të lirimit të hapësirave publike në rrugët në afërsi të Tregut të veturave, zonë në të cilën përveç papastërtisë që krijohet zakonisht, rrezikohet edhe shëndeti i qytetarëve nga therja (prerja) e shpezëve në kushte totalisht të papërshtatshme”, thuhet në njoftimin e Drejtorisë së Inspekcionit.

Për aksionin ka njoftuar edhe Ministria e Bujqësisë.

“Nga veprimet e tilla pa asnjë kontrollë higjienike ekziston edhe një numër i madh i faktorëve mikrobiologjik që e infekton/kontaminon mishin që nxirret nga shpezët të cilat theren në kushte jo-higjienike duke ju ekspozuar pluhurit, tymit të automjeteve dhe shumë papastërtive të tjera. Prandaj, si nga ata që tregtojnë e deri tek blerësit duhet ta kuptojnë se ky lloj i të bërit pazar është i rrezikshëm për shëndetin veterinarë (fondin e shpezëve), por mbi të gjitha për shëndetin njerëzor”, thuhet në reagimin e MBZHR-së. /Telegrafi/