Innovation Centre Kosovo (ICK) është nderuar me çmimin “Rising Star” në ceremoninë prestigjioze të Startup Ecosystem Stars (SES) Awards 2025, të mbajtur në selinë e International Chamber of Commerce (ICC) në Paris.
Ky vlerësim, i ndarë nga ICC dhe Mind the Bridge në bashkëpunim me OECD, Komisionin Europian dhe me mbështetje të Microsoft, e rendit ICK-në në mesin e 54 organizatave më me ndikim global në fushën e inovacionit dhe mbështetjes për startup-e.
Kategoria “Rising Star” nderon institucionet që po tregojnë rritje të shpejtë dhe potencial të lartë drejt pozicionimit si ndërtuese të ekosistemeve të avancuara të inovacionit.
Organizatorët vlerësuan se fituesit e kësaj kategorie janë organizata që po krijojnë ndikim të dukshëm në zhvillimin e sipërmarrjes dhe talenteve, duke kontribuar në ekonominë konkurruese dhe mbështetjes së komuniteteve dhe bizneseve.
Me këtë çmim, ICK forcon pozicionin e tij si një prej aktorëve kyç në inovacion në rajon, duke e vendosur Kosovën në hartën globale të organizatave që po formësojnë të ardhmen e sipërmarrjes dhe teknologjisë.
