Inaugurohet Qendra e Kulturës “Rexhep Mitrovica” në Mitrovicë, renovimi i saj vlerësohet si investim i nevojshëm

Gjatë mbrëmjes së të hënës është bërë hapja solemne e Qendrës së Kulturës “Rexhep Mitrovica” në Mitrovicë dhe sallës së teatrit “Muharrem Qena”, pas renovimit.

Pas renovimit, kjo hapësirë është transformuar në një simbol të vlerave kulturore e artistike për qytetin e Mitrovicës, shkruan Telegrafi.

Në këtë ngjarje kulturore ishin të pranishëm figura të njohura politike, kulturore e artistike.

Në këtë rast, kryetari i Komunës së Mitrovicës, Bedri Hamza, ka thënë se përkrahja për kulturën ka qenë një ndër prioritetet e tij.

“Në qeverisjen time kur kam konkuruar për të qenë kryetar i Komunës së Mitrovicës, i kam shpalosur prioritetet e mia. Një prej prioriteteve të mia ka qenë përkrahja për sportin, kulturën dhe rininë, jam i lumtur që po shkoj drejt realizimit të premtimeve të mia”, ka thënë Hamza.

Hamza ka thënë se ky është një investim i përbashkët mes Komunës së Mitrovicës dhe Ministrisë së Kulturës, Rinisë dhe Sportit.

Për këtë, ai është shprehur mirënjohës dhe falënderues ndaj ministrisë në fjalë.

“Është investim më shumë se një milion në komplet objektin, ndërsa investimi i përbashkët është në sallën e teatrit”, ka shtuar Hamza.

Ndërsa për fillimin e edicionit të 14-të të festivalit tradicional të komedisë “Mittrix Fest”, Hamza ka theksuar se është optimist se do të shohin shfaqje teatrale të mira.

“Unë jam i lumtur që sonte bashkë me juve do të jem prezent në njërën prej këtyre shfaqjeve”, ka përfunduar kryetari i Komunës së Mitrovicës, Bedri Hamza.

Për këtë ngjarje kulturore, sekretari i Ministrisë së Kulturës, Rinisë dhe Sportit (MKRS), Bislim Bislimi ka thënë se ky është rezultat i bashkëpunimit të ngushtë mes dy institucioneve, Komunës së Mitrovicës dhe MKRS-së.

“Aktualisht po zhvillojmë një numër të madh të projekteve të rëndësishme, investime në infrastrukturën kulturore, të trashëgimisë kulturore”, ka thënë Bislimi.

Ai është shprehur se ky është fillimi i përurimeve që i pret në Mitrovicë, transmeton Telegrafi.

“Andaj sot është vetëm fillimi i një cikli të gjatë të përurimeve që na pret në Komunën e Mitrovicës”, ka përfunduar sekretari i MKRS-së, Bislim Bislimi.

Ndërsa, aktori Fisnik Ademi është shprehur falënderues në emër të trupës artistike ndaj Komunës së Mitrovicës dhe Ministrisë së Kulturës, Rinisë dhe Sportit.

Ademi ka thënë se ky investim ka qenë i nevojshëm.

“Ky investim ka qenë mëse i nevojshëm për kushtet tona që të zhvillojmë artin tonë, të cilin besoj që publiku i Mitrovicës do ta shijojë në vitet në vazhdim”, ka thënë Ademi.

“Kënaquni me shfaqjen sonte që do të fillojë festivali tradicional i komedisë”, ka përfunduar aktori, Fisnik Ademi. /Telegrafi/