Sulmuesi i Lazios, Ciro Immobile, thotë se është e jashtëzakonshme që shënoi më shumë gola se lojtari që e merr si shembull, Robert Lewandowski.
Futbollisti italian ishte golashënuesi më i mirë në Evropë për sezonin 2019/2020 duke shënuar 36 gola në Serie A dhe e fitoi Këpucën e Artë evropiane.
Ai arriti ta linte prapa superyllin e Juventusit, Cristiano Ronaldo, në kampionatin italian, si edhe sulmuesin e Bayern Munichut, të cilin e ka model për ta ndjekur.
(Foto: Marco Rosi - SS Lazio/Getty Images/Guliver)
“Jam shumë krenar që e kam fituar Këpucën e Artë. Lewandowski ka qenë gjithmonë modeli që kam ndjekur”.
“Po të mund të votoja për Topin e Artë, do t’ia jepja atij votën”, ka deklaruar Immobile për Bild.
Kjo është hera e parë që një futbollist nga Serie A e fiton Këpucën e Artë evropiane që nga viti 2007, kur atë e kishte fituar ikona e Romës, Francesco Totti. /Telegrafi/
