Ilir Tasholli ka njoftuar tërheqjen nga kandidatura për Kryetar të Komunës së Lipjanit si dhe dorëheqjen nga të gjitha funksionet që ka ushtruar deri më tani brenda Aleancës për Ardhmërinë e Kosovës (AAK).
Lajmi është bërë i ditur nga vetë Tasholli përmes një postimi në faqen e tij zyrtare në Facebook, ku ka theksuar se vendimi është i vështirë, por i nevojshëm në këtë fazë të jetës së tij politike.
“Ky vendim nuk ka qenë i lehtë, por është marrë me bindjen se në këtë fazë, një hap i tillë është më i miri për rrugëtimin tim të mëtejmë. Falënderoj me zemër të gjithë bashkëpunëtorët, miqtë dhe qytetarët që më kanë mbështetur pa hezitim ndër vite – në sfidat lokale dhe ato qendrore. Mbështetja juaj ka qenë motivimi më i madh në çdo angazhim timin,” ka shkruar Tasholli.
Ai ka nënvizuar se megjithëse tërhiqet për momentin nga skena politike, angazhimi për të mirën e qytetarëve nuk përfundon këtu, duke lënë të hapur mundësinë për rikthim në të ardhmen.
Ky vendim i Tashollit vjen në një kohë kur përgatitjet për zgjedhjet lokale janë intensifikuar dhe pritet të ndikojë në skenën politike në komunën e Lipjanit, veçanërisht brenda AAK-së.
