Ibrahimi flet për të arriturat e IP-së, zotohet se Trepçës do t’ia kthejë shkëlqimin

Ish -kryeinspektori i Inspektoratit të Punës Basri Ibrahimi në një konferencë përshëndetëse ka folur për punën e Inspektoratit të Punës gjatë kohës sa ishte nën udhëheqjen e tij.

Ai thotë se me përvojën e tij menaxheriale, beson që si kryeshef i ri i Trepçës do ta kthejë atë në  një gjigant ekonomik, ashtu siç ishte dikur.

Ish kryeinspektori i Punës ka folur për të arriturat e institucionit që ka udhëhequr, ndërsa  u ka bërë thirrje ministrive përgjegjëse që të bëjnë më shumë për ngritjen e IP-së.

Ibrahimi thotë se IP-ja nga një organ këshillëdhënës tashmë është një organ vendimmarrës dhe se vendimet e tij janë të padiskutueshme në të gjithë sektorët.

“Në momentin kur unë kam ardhur në Inspektorat të Punës , PK ka qenë një organ këshillëdhënës…ne kemi arritë që ta ndërtojmë dhe ta ngrisim IP bashkë me kolegët dhe të tjerët që kanë punuar pandërprerë në një institucion sot kredibil, një institucion të rëndësishëm, në një institucion që sot vlerësohet prej te gjithëve pavarësisht prej pakënaqësive që mund ti ketë ose edhe mendimeve të ndryshme që mund ti ketë qoftë mediat, qoftë shoqëria civile qoftë politika e kushdo qoftë tjerët. Pra besoj që kemi arrit ta ndërtojmë një institucion kredibil. Pra sot vendimet e IP janë të padiskutueshme në të gjitha sektorët qoftë ato publike, qoftë ato private në një institucion vendimet e të cilit nuk kontestohen’, tha ai.

Ibrahimi tha se vitin e kaluar numri i ankesave të punëtorëve ka shkuar në mbi 1700 dhe janë raportuar mbi 120 aksidente në vendin e punës, numër ky që sipas tij është dyfishuar krahasuar  me vitet paraprake.

“Në momentin që e kam marrë këtë institucion me udhëheqë ankesat nga ana e punëtorëve kanë qenë minore gati të papërfillshme. Ne kemi arrit mbi 1700 ankesa në vitin e kaluar. Edhe pse ende nuk jam i kënaqur, ende ka nevojë për përmirësime.  Pra numri prej 1700 ankesave është një barometer i qartë për të vlerësuar se sa është ngritë autoriteti i IP-së”, tha Ibrahimi.

Ish kryeinspektori i Inspektoratit të Punës ka thënë se vendimet e këtij institucioni nuk kanë pasur asnjëherë qasje politike.

Sipas tij,  nuk ka pasur imunitet askush, pavarësisht çfarë pozite ka pasur qoftë, pulitke apo financiare.

‘Në kemi shqiptuar gjobë edhe ndaj Ferronikelit edhe ndaj Sharcenit, edhe ndaj rektorëve edhe ndaj drejtorëve të SHSKKUK-së QKUK edhe ndaj drejtorëve të arsimit.. atëherë nuk e di se ku mundet dikush tjetër më i fuqishëm qoftë politikisht, qoftë ekonomikisht çfarëdo mënyrë qoftë, ndaj të gjithëve kemi shqiptuar gjoba nga ana e inspektorëve se nuk po i përmbahen rregullave ligjore”, tha Ibrahimi.

Ibrahimi bëri të ditur se në Prishtinë  inspektorët kanë mbyllur ose pezulluar punimet në 120 vend punishte në  ndërtimtari, praktikë kjo që është ndjekur edhe në Gjilan, Prizren e të tjera.

Ai ka apeluar nga institucionet të bëjnë më shumë për Inspektoratin e Punës dhe ngritjen e mëtutjeshme të këtij institucioni, gjë e cila sipas tij do të jetë në të mirë të shoqërisë dhe të shtetit.

Ai ka kërkuar edhe rritjen e pagës  për Inspektorët e Punës, për shkak të ndjeshmërisë dhe përgjegjësisë që ka kjo kategori, e sidomos të evitohet edhe marrja e ryshfetit.

Basri Ibrahimi i cili është zgjedhur  Kryeshef Ekzekutiv i  sh. A “Trepça’ është pyetur nga gazetarët edhe për objektivat që ka për të udhëhequr me këtë ndërmarrje, duke pasur parasysh gjendjen në të cilën ndodhet sot .

Ibrahimi është shprehur optimist që do të punojnë në atë mënyrë që Trepça të kthehet në një gjigant ekonomik ashtu siç ka qenë.

“Unë jam njeri i sfidave që i pranoj sfidat dhe nuk frikohem nga sfidat. Jam mitrovicas me prejardhje dhe Mitrovicën e dua dhe kam dëshirë që kthehem të kontribuoj në Mitrovicë…Por edhe gjendja çfarë është në Trepçë unë besoj që është për shkak të faktorit njeri, tu i pasë të gjitha  çështjet politike që janë ndërlidhë me Trepçën, por unë besoj që edhe faktori njeri ka qenë përcaktues për gjendjen çfarë është sot Trepça, sigurisht që nuk është në gjende të mirë  Unë besoj në kapacitet e mia intelektuale dhe menaxheriale dhe përvojën time që e kam dhe me njerëzit që do të provoj ti ofroj afër vetës dhe me kapacitetet e brendshme besoj shumë që do ta ndryshojmë gjendjen në Trepçë”, tha Ibrahimi.

Basri Ibrahimi për 9 vite ka  mbajtur postin e Kryeinspektorit të Punës, ndërsa në fund të muajit maj, ku është zgjedhur Kryeshef Ekzekutiv i ndërmarrjes ‘Trepça’ nga bordi mbikëqyrës. /KP/Telegrafi/